Նոր «Թվին Փիքս»-ում կհայտնվեն Մոնիկա Բելուչին և Թիմ Ռոթը
Showtime հեռուստաալիքը հրապարակել է այն դերասանների ցուցակը, ովքեր նկարահանվել են «Թվին Փիքս» վերածնված սերիալի նոր սեզոնում: Նախագծի 217 մասնակիցների թվում են Մոնիկա Բելուչին եւ Թիմ Ռոթը, հաղորդում է Variety-ն: Նոր դրվագների պրեմիերան կկայանա 2017 թվականին:
Սերիալում առաջին անգամ կխաղան նաեւ Նաոմի Ուոթսը, Ջիմ Բելուշին, Ամանդա Սեյֆրիդը, Էշլի Ջադը, Էդդի Վեդերը եւ Թրենթ Ռեզնորը:
Իրենց դերերին կվերադառնան այն դերասաններից մի քանիսը, որոնք նկարահանվել են «Թվին Փիքս»-ի առաջին երկու սեզոններում՝ Դեւիդ Դուխովնին, Քայլ Մաքլահլենը, Շերիլ Լին, Դեւիդ Փաթրիկ Քելինը եւ Շերիլին Ֆենը:
Նոր «Թվին Փիքս»-ը, որը նկարահանում է Դեւիդ Լինչը, օրիգինալ սերիալի շարունակությունն է եւ, ինչպես ընդգծում են պրոդյուսերները, նրա երրորդ սեզոնն է (նախորդի ցուցադրությունն ավարտվել է 1991 թվականին):
«Թվին Փիքս»-ն ամերիկյան ABC ալիքով ցուցադրվել է 1990 թվականի ապրիլից: Այն բաղկացած է 30 սերիայից: Սյուժեն ծավալվում է դպրոցական Լորա Փալմերի (Շերիլ Լի) սպանության շուրջ, որը հետաքննում է Հետաքննությունների դաշնային բյուրոյի հատուկ գործակալ Դեյլ Քուփերը (Քայլ Մաքլահլեն):
