Էդվարդ Նալբանդյանն ընդունել է ՀԱՊԿ երկրների փոխարտգործնախարարներին
Հայաստանի արտաքին գործերի նախարար, ՀԱՊԿ ԱԳ նախարարների խորհրդի նախագահ Էդվարդ Նալբանդյանն ապրիլի 19-ին ընդունեց ՀԱՊԿ անդամ երկրների արտաքին գործերի փոխնախարարներին և ՀԱՊԿ գլխավոր քարտուղարի տեղակալին, ովքեր Երևան են ժամանել Հայաստանի նախաձեռնությամբ անցկացվող ԱԳ փոխնախարարների մակարդակով խորհրդատվություններին մասնակցելու նպատակով։
ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից տեղեկացնում են, որ՝ ողջունելով հյուրերին՝ նախարար Նալբանդյանը կարևորեց հանդիպման անցկացումը՝ նշելով, որ դա լավ հնարավորություն է նախապատրաստելու Երևանում կայանալիք ՀԱՊԿ արտգործնախարարների խորհրդի և Հավաքական անվտանգության խորհրդի նիստերը։
Խորհրդակցության մասնակիցները ներկայացրին իրենց հանդիպմանը կայացած քննարկումների արդյունքները։
Խոսելով ՀԱՊԿ անդամ երկրների միջև արտաքին քաղաքականության համադրման մասին՝ նախարար Նալբանդյանը առանձնահատուկ ընդգծեց ղարաբաղյան հիմնախնդրի բացառապես խաղաղ կարգավորմանն ուղղված՝ ԵԱՀԿ Մինսկի խմբի համանախագահների ջանքերին աջակցության կարևորությունը, ինչն ամրագրված է նաև ՀԱՊԿ գագաթաժողովների և ԱԳ նախարարների խորհուրդների կողմից ընդունված փաստաթղթերում։
Հանդիպմանն անդրադարձ կատարվեց ՀԱՊԿ-ում Հայաստանի նախագահության շրջանակներում կազմակերպության օրակարգային հարցերի։
