«Իհարկե. այսօրվա թեմա չէ, բայց չենք կարող չաշխատել, չտեսնել ու չխոսել»
Երեկ քաղաքապետարանում կայացած գործակարգավարական խորհրդակցության ժամանակ, որը վարում էր փոխքաղաքապետ պարոն Արեյանը, թ.56 և թ.57 հսկողականների վերաբերյալ Կենտրոն և Քանաքեռ-Զեյթուն վարչական շրջանների ղեկավարները խրոխտ ձայնով շատ կարճ զեկուցեցին այն մասին, որ «Օղակաձև» և «Հաղթանակ» զբոսայգիներում իրականացվել են մաքրման, խնամքի և այլ բարեկարգման աշխատանքներ: Երկու զբոսայգիների վիճակը մեր քաղաքացիները լավ գիտեն, վիճակն անմխիթար է:
Պարոն Արեյանը նաև խստորեն հանձնարարեց ասֆալտապատման գործն իրականացնող գործընկերություններից պահանջել փողոցների ասֆալտի վնասված տեղերը մեկ-մեկ բացել, ասֆալտը վերականգնել ու նոր անցնել հաջորդին: Այնինչ, Տիգրան Մեծի պողոտան այսօր ծայրից ծայր ծակված էր, իսկ այդ ծակերը ոչ ոք չէր լցնում:
Չեմ հասկանում, երբ փոխքաղաքապետը հանձնարարում և խստորեն պահանջում է գործողություն, որը չի կատարվում այն էլ քանիերորդ անգամ, այսինքն այն լսող չկա, ինչո՞ւ քաղաքապետարանը այդ կազմակերպությունների նկատմամբ սթափեցնող քայլ չի անում:
Իհարկե, Երևանի քաղաքապետարանի անհետևողական գործունեությունը պետական կառավարման օղակում միակը չէ, կառավարման բոլոր օղակներում այս նույն վիճակն է, կարծես ձևի համար են խիստ-խիստ ու բարկացած տոնով հանձնարարում՝ նախապես իմանալով, որ իրենց ենթակաները այդ հանձնարարականը չկատարելու համար հազար ու մի պատճառ ունեն:
Հրապարակում եմ այդ զբոսայգիների որոշ հատվածների այսօրվա լուսանկարները, որոնք հակառակի մասին են վկայում:
Անահիտ Բախշյան
Երևանի ավագանու «Բարև Երևան» խմբակցության անդամ
