«Հիմա դուք բարձր կարգի միջազգային պաշտոնյա եք». Պուտինը՝ Տիգրան Սարգսյանին
Այսօր Կրեմլում ՌԴ նախագահ Վլադիմիր Պուտինն ընդունել է Եվրասիական տնտեսական հանձնաժողովի կոլեգիայի նախագահ Տիգրան Սարգսյանին: Այս մասին տեղեկացնում է Կրեմլի պաշտոնական կայքը:
Հանդիպման սկզբում Վ. Պուտինը նախ ընդգծել է, որ իրենք շատ լավ ծանոթ են դեռևս այն ժամանակներից, երբ գլխավորում էին իրենց երկրների կառավարոթյունները: Այնուհետև Վ. Պուտինն ասել է. «Հիմա դուք շատ պատասխանատու առաքելություն ունեք, դարձել եք միջազգային պաշտոնյա, բարձր կարգի պաշտոնյա:Հուսով եմ, որ ձեր ղեկավարությամբ Եվրասիական միության հանձնաժողովը հաջող կաշխատի»:
Վ. Պուտինի խոսքով՝ Եվրասիական տնտեսական հանձնաժողովի կոլեգիայի նախկին նախագահ Վիկտոր Խրիստենկոն մեծ աշխատանք է կատարել, և հիմա պետք է օգտագործել այս ինտեգրացիոն միավորման առավելությունները, որպեսզի երկրների առջև ծառացած խնդիրները լուծվեն:
Միաժամանակ Վ. Պուտինը ընդգծել է, որ շուտով Երևանում տեղի է ունենալու ԵԱՏՄ երկրների վարչապետների հանդիպում, իսկ ավելի ուշ` երկրների ղեկավարների հանդիպում Ղազախստանի մայրաքաղաքում:
Տիգրան Սարգսյանը վստահեցրել է, որ հանձնաժողովն ամեն ինչ անելու է, որպեսզի ԵԱՏՄ երկրների մատնանշած առաջնահերթություններն իրականացվեն ամբողջ ծավալով:
