Մոսկվան Էր-Ռիադին մեղադրում է նավթային բանակցությունները ձախողելու մեջ
Ռուսաստանը Սաուդյան Արաբիային ու Պարսից ծոցի մի շարք երկրների մեղադրել է նավթարդյունահանման սառեցման մասին համաձայնագիրը ձախողելու մեջ: Այս մասին հայտարարել է ՌԴ էներգետիկայի նախարար Ալեքսանդր Նովակը:
«Հիմա դա, հավանաբար, գաղտնիք չէ: Դա Սաուդյան Արաբիան է և Պարսից ծոցի մի շարք երկրներ»,- հայտարարել է Նովակը:
Նա նշել է, որ պայմանավորվածությունների բացակայությունը կարող է բացասաբար ազդել նավթի շուկայում գների վրա:
«Սակայն, այդուհանդերձ, մենք կարծում ենք, որ դա չի բացառում գնագոյացման շուկայական մեխանիզմները»,- ասել է Նովակը:
Հիշեցնենք, որ Դոհայում նավթի արտադրողների բանակցությունները անարդյունք են եղել, ինչի հետևանքով նավթը զգալի էժանացել է, որին հաջորդել է ռուսական ռուբլու փլուզումը:
