Էկվադորում երկրաշարժի զոհերի թիվը գերազանցել է երկու հարյուրը
Էկվադորում երկրաշարժի հետևանքով զոհերի թիվը հասել է 272-ի: Ավելի քան 2000 մարդ է տուժել: Այս մասին հայտնել է Էկվադորի նախագահ Ռաֆայել Կորրեան, տեղեկացնում է korrespondent.net-ը:
Երկրի կառավարությունը մոտավորապես 10 հազար զինվորական և 3,5 հազար ոստիկան է ուղարկել այն շրջաններ, որտեղ տեղի է ունեցել երկրաշարժը: Նպատակը երկրաշարժից տուժած մարդկանց օգնելն է: Այս մասին Twitter-ի իր միկրոբլոգում գրել է երկրի փոխնախագահ Խորխե Գլասը:
Էկվադոր են ուղարկվել նաև այլ երկրներից փրկարարներ, այդ թվում՝ Մեքսիկայից և Կոլումբիայից:
Հիշեցնենք, որ 7,8 մագնիտուդով երկրաշարժը տեղի է ունեցել ապրիլի 17-ին: Երկրաշարժի էպիկենտրոնը գտնվել է Էկվադորի Մանաբի նահանգում:
