«Փառք Աստծո` այդ պահին տանը չէի». ասում է մարտակերտցի 77-ամյա Գուրգեն պապը
Մարտակերտի Պարույր Սեւակ թաղամասում ապրող Գուրգեն Նալբանդյանի եւ կնոջ համատեղ ուժերով 40 տարի առաջ կառուցված տունն ապրիլի 3-ին հրետակոծության հետեւանքով վնասվել է։
Գուրգենը տան միակ բնակիչն է. կինը մահացել է 5 տարի առաջ, աղջիկներն ամուսնացած են։ Դեպքի պահին Գուրգեն Նալբանդյանը տանը չէր: «Վարչակազմի շենքում էի. ծանոթներիցս մեկն ասաց, որ տունս վնասվել է: Դու մի ասա` ոչ թե վնասվել է, այլ տնիցս բան չի մնացել»,- aparaj.am-ի հետ զրույցում ասում է նա։
Տան խոհանոցն ու բաղնիքն ամբողջությամբ ավերված են, վնասվել են նաեւ պատշգամբն ու դարպասը։
«Տունը կառուցվում ու վերանորոգվում է, իսկ մարդուն հնարավոր չէ վերակառուցել: Փառք Աստծո` այդ պահին տանը չէի,- ասում է 77-ամյա Գուրգեն պապը եւ նշում, որ թեկուզ աղջիկները պնդում են, որ իրենց մոտ տեղափոխվի, սակայն գնալու մտադրություն չունի,- թող մեր թշնամին խելքը գլուխը հավաքի, մենք այստեղից գնացողը չենք. ես ծնվել եմ Մարտակերտում, Մարտակերտում էլ պիտի մեռնեմ»։
Կրած վնասների չափերը գույքագրել է ԼՂՀ Աշխատանքի եւ սոցիալական հարցերի նախարարության աշխատանքային խումբը։ Գուրգեն Նալբանդյանի տան վերանորոգման աշխատանքներն արդեն սկսվել են։
Քառօրյա պատերազմի հետևանքով վնասված կենցաղային տեխնիկաների խնդրի լուծումը ստանձնել է պետությունը։
Լուսինե Թեւոսյան
