«Չկա ավելի լավ խաղաղարար, քան հայ զինվորը». Արմեն Մարտիրոսյան
«Ժառանգություն» կուսակցությունը դեմ է օտար զորքերի ներկայությանն Արցախում։ Այս մասին այսօր լրագրողների հետ հանդիպման ընթացքում ասաց կուսակցության փոխնախագահ Արմեն Մարտիրոսյանը։
«Չկա ավելի լավ խաղաղարար, քան հայ զինվորը, և այս տարիների ընթացքում մենք ոչ մեկ անգամ և ոչ միայն՝ Հայաստանի կամ Արցախի տարածքում ենք ցույց տվել, որ հայ զինվորը շատ լավ խաղաղապահ գործունեություն կարող է իրականացնել»։
Արմեն Մարտիրոսյանը նշեց, որ պատմությունը ցույց է տվել՝ բոլոր այն դեպքերում, երբ տարածաշրջան խաղաղապահներ են մտել, մենք տարածքային կորուստներ ենք ունեցել։
Ըստ նրա՝ «Ժառանգություն» կուսակցությունն ի սկզբանե դեմ է եղել Մադրիդյան սկզբունքներին, քանի որ, մի շարք պատճառներով, դրանք չեն հանապատասխանում մեր շահերին։ Մարտիրոսյանը նշեց, որ միասնությունը միշտ «Ժառանգության» շուրթերին է եղել, սակայն միասնությունը պետք է բովանդակային լինի. «Ազգային համաձայնություն չի կարող լինել, եթե ազգային համաձայնության մի մասը նորից այն չինովնիկները, օլիգարխները, ֆեոդալները, գեներալներն են, որոնց պատճառով տեղի ունեցավ այդ ամենը, որոնց պատճառով մոտ 8 տասնյակի հասնող զոհեր ունեցանք, որոնց թալանի, պետական ռեսուրսի մսխման պատճառով է, որ մենք այսօր համապատասխան ձևով պատրաստված չենք, որպեսզի Ադրբեջանը վախենար մի փոքր կրակոց արձակել, որոնց կատարած քայլերի արդյունքում է այս տարիների ընթացքում արտագաղթը նմանատիպ ծավալների հասել։
Իսկ արտագաղթը նշանակում է նաև՝ զինվորների բացակայություն, ռեզերվի բացակայություն։ Կողմ լինելով համախմբմանը, միասնությանը՝ այդ համախմբումը տեսնում ենք նաև բովանդակային իմաստով»։
Նա նշեց, որ Հայաստանում քաղաքական դաշտը, հասարակությունը պետք է միավորվեն, անհրաժեշտ է, որ երկրում ձևավորվի ազգային համաձայնության կառավարություն, իշխանությունն ասեր, որ Ընտրական օրենսգրքի հետ կապված ընդդիմության առաջարկներն ընդունվում են։
«Այս պահին էր, որ Սերժ Սարգսյանն անմիջապես պետք է բանտերից ազատ արձակեր բոլոր քաղբանտարկյալներին, և այդ պարագայում էր, որ Հայաստանը կարող էր ուժեղանալ»,- ասաց Մարտիրոսյանը՝ ավելացնելով, որ տեղի են ունենում ներքաղաքական զարգացումներ, նախագահ Սերժ Սարգսյանի և առաջին նախագահ Լևոն Տեր-Պետրոսյանի հանդիպումն այդ շրջանակներում էր, սակայն «Ժառանգության» համար կան անփոփոխ դրույթներ, մասնավորապես՝ Հայաստանը տնտեսապես զարգանալու հնարավորություն ունի, պետք է բացահայտվեն յուրացումները, գումարները ներդրվեն պաշտպանության բնագավառի զարգացման համար։
«Տեղեկատվությունը, որ ստանում ենք, թե ինչ է եղել ապրիլի 2-ին, ինչ զարգացումներ են հետևել դրան հաջորդող օրերին, մեզ պարզապես համոզում է այն բանում, որ մեր պաշտպանական դոկտրինը, մեր ներքին քաղաքականությունն արմատական վերանայման կարիք ունեն։ Եվ, վերջապես, Հայաստանին պետք չեն այսպիսի անողնաշար իշխանություններ»։
