«Աշոտ Շահբազյանը մինչև վերջ պայքարել է»
Արցախում զոհված զինծառայող Աշոտ Կարապետի Շահբազյանը Շիրակի մարզի Ախուրյան համայնքի բնակիչ էր: Այսօր հարազատ գյուղում տեղի կունենա 1993թ. ծնված, կոչումով լեյտենանտ երիտասարդի հոգեհանգստի արարողությունը, իսկ վաղը՝ հուղարկավորությունը:
Ախուրյան համայնքի ղեկավար Արծրունի Իգիթյանը 168.am-ի հետ զրույցում ասաց, որ Աշոտ Շահբազյանի հայրն ազատամարտիկ է, դեռևս 1992թ. կամավոր մասնակցել է ղարաբաղյան պատերազմին: Աշոտն իրենից փոքր եղբայր ունի: «Նորմալ տղա էր, հայրենասեր: Մինչև վերջ էլ ինքը պայքարել է»,- ասաց համայնքի ղեկավարը՝ նշելով, որ ապրիլի 1-ի լույս 2-ի գիշերը գործողությունները սկսելուց հետո ծնողների հետ չի կապ չի եղել. դիերի փոխանակման ընթացքում է նա հայտնաբերվել:
