ԼՂ հակամարտության լուծումը ԵԱՀԿ-ի պատասխանատվությունն է. Լուկաշևիչ
Ղարաբաղյան հակմարտության լուծումը բացառապես ԵԱՀԿ-ի պատասխանատվությունն է, մյուս կազմակերպությունները կարող են ընդամենն օգնել: Այս մասին հայտարարել Է ԵԱՀԿ-ին առընթեր ՌԴ մշտական ներկայացուցիչ Ալեքսանդր Լուկաշևիչը, տեղեկացնում է RIA Novosti-ն:
«Ղարաբաղյան հակամարտությունը բացառապես ԵԱՀԿ-ի պատասխանատվությունն է, մյուս բոլոր կազմակերպությունները կարող են ըստ էության նպաստել ԵԱՀԿ-ի ջանքերին, սակայն դա իրական հակամարտություն է, որով զբաղվում և պարտավոր է զբաղվել մեր կազմակերպությունը: Այստեղ 100 տոկոսանոց պատասխանատվությունը նրա համար, ինչ տեղի է ունենում հակամարտության գոտում, որպես աջակցող կողմի, իհարկե, ԵԱՀԿ-ինն է»,- ասել է նա «Ռուսաստանն այսօր»-ի կողմից կազմակերպվող Մոսկվա-Վիեննա տեսակամրջի ժամանակ:
Նա նաև հայտարարել է, որ Լեռնային Ղարաբաղում զինադադարը հաջողվել է կյանքի կոչել շնորհիվ Ռուսաստանի ջանքերի:
«Մենք ընդգծել ենք մեր հարգանքը և ամբողջական աջակցությունը ԵԱՀԿ-ի համանախագահող եռյակի ջանքերին և օգտագործել ենք մեր հնարավորությունները՝ ազդելու հակամարտության կողմերի վրա, որոնց հետ ունենք ռազմավարական հարաբերություններ»,- հայտարարել է Լուկաշևիչը:
«Հենց ՌԴ-ի նման մասշտաբային և բարձր միջամտությունը թույլ տվեց հասնել հրադադարի»,- հավելել է նա:
