Զինվորների համար Մաշտոցի պուրակում հավաքագրվում են տարբեր իրեր
«Աջակցենք սահմանամերձ բնակավայրերին» նախաձեռնությունը ռազմաճակատում կռվողներին օգնելու համար կազմակերպել է տարբեր իրերի հավաքագրում: Մաշտոցի պուրակում հասարակ քաղաքացիները, կազմակերպություններն իրենց աջակցությունն են ցուցաբերում զինվորներին` բերելով տարբեր իրեր` հագուստեղեն, սնունդ, ըմպելիքներ և այլն:
«Հենց Արցախում սկսվեց լարվածությունը, մենք անհանգստացանք, որոշեցինք հավաքվել և տեսնել, թե ինչով կարող ենք օգտակար լինել: Փորձեցինք հասկանալ, թե ինչի կարիք կա, համակարգեցինք և պատրաստեցինք միջոցառման ազդը: Ապրիլի 4-ից սկսել ենք հավաքագրումը, ակտիվությունն ու մարդկանց պատրաստակամությունը մեծ է»,- «Արմենպրես»-ի հետ զրույցում նշեց «Աջակցենք սահմանամերձ բնակավայրերին» նախաձեռնության անդամ Անի Հովհաննիսյանը:
Նրա տեղեկացմամբ` բերված ապրանքները պարտադիր ստուգվում են, փաթեթավորվում են: «Ավելի շատ տաք հագուստների, վերմակների, դեղորայքի կարիք ունենք: Նախորդ օրվանից շատ քաղցրավենիք և սնունդ ունենք»,-հավելեց նա:
«Աջակցենք սահմանամերձ բնակավայրերին» նախաձեռնության անդամ Էռնեստ Ավանեսովն էլ տեղեկացրեց, որ նախատեսվածից շուտ մարդիկ գալիս են, իրեր են բերում: «Հավաքագրումը կշարունակվի նաև ապրիլի 6-ին»,-հավելեց նա:
Նախաձեռնության անդամները քաղաքացիների բերած իրերն առաջիկա օրերին կուղարկեն Արցախ:
