«Դժվարանում եմ ասել՝ իշխանափոխություն կլինի՞, թե՞ ոչ». Արմեն Մարտիրոսյան
«Եթե այսպիսի Ընտրական օրենսգիրք ընդունվի, ապա իշխանությունները երկրում իսկապես այլ տարբերակ չեն թողնում՝ բացի զինված պայքարը: Պարզ տրամաբանությունը բերում է դրան. եթե դու ընտրական մեխանիզմներով չես կարողանում փոխել իշխանությանը, ապա մնում է միայն պայքարի ուղին՝ զինված կամ խաղաղ ճնշմամբ»,- 168.am-ի հետ զրույցում նման տեսակետ հայտնեց «Ժառանգություն» կուսակցության փոխնախագահ Արմեն Մարտիրոսյանը:
Նրա խոսքով՝ նման մեթոդաբանությամբ առաջ շարժվելը, այն էլ՝ այսպիսի մարտահրավերներ ունեցող երկրում, իսկապես շատ մեծ խնդիրների առջև կարող է կանգնեցնել երկիրը:
– Այսինքն, ըստ Ձեզ, եթե նոր Ընտրական օրենսգիրքն (ԸՕ) ընդունվի այս տարբերակով՝ վտանգներ կան, որ երկրում զինված պայքա՞ր կսկսվի իշխանությունների դեմ:
– Չէ, ոչ թե վտանգ կա, որ զինված պայքար կսկսվի, այլ վտանգը կայանում է նրանում, որ խաղաղ եղանակով, ընտրությունների միջոցով իշխանափոխության մեխանիզմն իսպառ վերանում է: Բնականաբար, այսպիսի ոչ արդյունավետ կառավարման պայմաններում երկու ճանապարհ է մնում՝ կա՛մ քաղաքացիներն արտագաղթում են, կա՛մ ինչ-որ զինված կամ խաղաղ պայքար է լինում, որի արդյունքում իշխանափոխություն է լինում: Ինձ համար նախընտրելի կլիներ, որ հանգուցալուծումն ընտրություններով լիներ, այսինքն՝ իշխանությունը փորձի ընտրական մեխանիզմներով իշխանությունը զիջի:
– Մյուս կողմից էլ՝ «Նոր Հայաստան» ընդդիմադիր շարժումը, որի անդամն եք Դուք, ասում է, որ գնում է արտահերթ ընտրությունների: Հնարավո՞ր է՝ այդ զինված պայքար սկսողը հենց «Նոր Հայաստանը» լինի:
– Չէ, իմ խոսքը դրան չէր վերաբերում, սա ընդամենը վերլուծություն էր՝ աշխարհի փորձը հաշվի առնելով: Ամեն նախագահական ընտրություններից հետո ժողովուրդն ընդվզում էր, որովհետև իշխանություն չէր կարողանում փոխել, կեղծվում էր: 2008 թվականին ապօրինի զենք կիրառողն իշխանությունը եղավ, ուստի սա չի վերաբերում նրան, որ ես կոչ եմ անում՝ անպայման զենքով գնանք՝ իշխանություն վերցնենք: Ես կարծում եմ՝ Հայաստանում եթե հասարակությունը ոտքի կանգնի, խաղաղ եղանակով էլ է հնարավոր իշխանափոխություն իրականացնել, բայց նաև ասում եմ նրա մասին, որ իշխանությունը քաղաքական, տնտեսական ճգնաժամերը չի թողում հանուցալուծվի ընտրություններով: Եթե նայում ենք այս իրավիճակին՝ դա պետք է բերեր իշխանափոխության, որպեսզի քաղաքական այդ ճգնաժամը լուծվեր: Ես ասում եմ՝ քաղաքական ճգնաժամը չի լուծվում, ու դա բերում է ոչ ընտրական մեխանիզմներով իշխանափոխության՝ կլինի դա խաղաղ եղանակո՞վ, թե՞ զինված:
– Որքանո՞վ եք իրատեսական համարում արտահերթ ընտրությունների միջոցով իշխանափոխություն անելը, ու եթե չստացվի մինչև ընտրությունները իշխանափոխություն անել, «Ժառանգությունը» բոյկոտելո՞ւ է ընտրությունները և չի՞ մասնակցելու:
– «Ժառանգության» մասով դեռևս չեմ կարող ձեզ ասել, քանի մենք այդ հարցը դեռ չենք քննարկել: Եթե մենք նայում ենք սոցիալ-տնտեսական իրավիճակին, վաղուց պետք է դա լիներ, բայց երբ բերում ենք առկա քաղաքական դաշտ, իրողություններ, աշխարհաքաղաքական շահեր, հասարակության տրամադրությունը, հակվածությունը նման փոփոխություններին, ցավոք սրտի, դա չկա: Դրա համար այս պահին դժվարանում եմ ասել՝ կլինի՞ դա, թե՞ ոչ:
Մանրամասները՝ 168.am-ի տեսանյութում:
