Բրիտանացի գիտնականները հայտարարել են քաղցկեղի բուժման բնագավառում բեկման հասնելու մասին
Բրիտանացի գիտնականները պնդում են, որ գտել են եղանակը՝ մարդու իմունային համակարգին ստիպելու արդյունավետորեն պայքարելու քաղցկեղային ուռուցքների դեմ: Այս մասին տեղեկացնում է BBC-ն:
Թեեւ նոր թերապիան կլինիկորեն չի փորձարկվել, եւ բուժման մեթոդը գործնականում կարող է շատ թանկ լինել, հետազոտողները հայտնագործություն ամենահեռանկարայիններից մեկն են համարում վերջին ժամանակներս քաղցկեղի դեմ մղվող պայքարում:
Նոր բուժման էությունը յուրաքանչյուր անհատական ուռուցքի հետազոտումն է եւ դրա այն մասերի նույնականացումը, որոնց վրա կարելի է «ուղղորդել» օրգանիզմի իմունային համակարգը:
Ինչպես ասում են բժիշկները, նոր թերապիան անհատական բուժման գաղափարը հասցնում է կատարելության: «Յուրաքանչյուր հիվանդի համար ըստ էության կմշակվի բուժման եզակի մեթոդ»,- հայտարարել է պրոֆեսոր Չառլզ Սուոնթոնը Համալսարանական քոլեջի քաղցկեղի ինստիտուտից:
