Կախա Կալաձեն «Գապրոմի» հետ բանակցություններից ձեռնունայն է վերադարձել
Վրաստանի էներգետիկայի նախարար Կախա Կալաձեի հանդիպումները ռուսական «Գազպրոմ» ընկերության հետ ավարտվել են, աշխատանքային գործընթացը շարունակվում է համաձայնություն ձեռք բերելու նպատակով, հայտնում է RIA Novosti-ն՝ հղում կատարելով Վրաստանի էներգետիկայի նախարարությանը:
«Վիեննայում տեղի է ունեցել «Գազպրոմի» ներկայացուցիչների ու վրացական կողմի աշխատանքային հանդիպումը: Բանակցությունների առարկան չի փոխվել, ու աշխատանքային գործընթացները շարունակվում են կողմերի համար ընդունելի պայմաններով համաձայնություն ձեռք բերելու նպատակով»,- ասված է Վրաստանի էներգետիկայի նախարարության հայտարարության մեջ:
Վրաստանի ընդդիմությունն ու փորձագետները քննադատում են Կախա Կալաձեին՝ պնդելով, որ «Գազպրոմի» հետ համագործակցությունը Վրաստանին կզրկի էներգետիկ անկախությունից:
Հիշեցնենք, որ երեկ տեղեկացրել էինք, որ Կալաձեն Վիեննայում դարձյալ հանդիպելու է ռուսական ընկերության ներկայացուցիչների հետ:
