Ամբաստանյալը հայտնել է, որ քննիչի կողմից ցմահ ազատազրկման դատապարտվելու սպառնալիքի տակ տվել է իրականությանը չհամապատասխանող ցուցմունք
ՀՀ Կոտայքի մարզի ընդհանուր իրավասության դատարանում քննվող քրեական գործով ամբաստանյալ Կարեն Ա.-ն հաղորդում է տվել այն մասին, որ իր վերաբերյալ քննվող հիշյալ քրեական գործի նախաքննության ընթացքում ՀՀ քննչական կոմիտեի Կոտայքի մարզային քննչական վարչության ավագ քննիչի թելադրանքով՝ ցմահ ազատազրկման դատապարտվելու սպառնալիքի տակ, իր ցուցմունքում գրել է, թե, իբր, իրեն դանակով հարվածել և մարմնական վնասվածք է պատճառել քաղաքացի Վ. Ղ.-ն, մինչդեռ իրականում դանակով իրեն հարվածներ է հասցրել քաղաքացի Ա. Ի.-ն, ում ինքը սպանել է:
ՀՀ քննչական կոմիտեի Կոտայքի քննչական վարչության ավագ քննիչի կողմից պաշտոնեական լիազորություններն անցնելու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 309-րդ հոդվածի 1-ին մասի հատկանիշներով հարուցվել է քրեական գործ:
Կատարվում է նախաքննություն:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
