Մոսկվան խառնել է բոլոր խաղաթղթերը սիրիական կոնֆլիկտում. ԵՄ բարձրաստիճան դիվանագետներ
ԵՄ դիվանագիտության ղեկավար Ֆեդերիկա Մոգերինին կարծում է, որ Սիրիայում Ռուսաստանի ռազմական միջամտությունը արմատապես փոխել է այդ երկրում իրադարձությունների զարգացման ընթացքը:
Այս մասին նա հայտարարել է հոկտեմբերի 12-ին՝ բացելով Լյուքսեմբուրգում Եվրամիության արտգործնախարարների խորհրդի նիստը, տեղեկացնում է korrespondent.net-ը:
Նա մատնանշել է փաստեր, որոնք «հարուցում են չափազանց մեծ անհանգստություն»՝ որպես օրինակ բերելով ռուսական ինքնաթիռների կողմից Թուրքիայի օդային տարածքը հատելու փաստը:
Մոգերինին դարձյալ կոչ է արել ռուսական ղեկավարությանը Սիրիայում ռազմական գործողությունները կոորդինացնել ԱՄՆ-ի գլխավորած միջազգային հակաահաբեկչական դաշինքի հետ: Նման կոորդինացիայի բացակայությունը վտանգավոր է ոչ միայն քաղաքական, այլև ռազմական առումով, ընդգծել է նա:
Պատասխանելով հարցին՝ արդյոք հնարավո՞ր է Ասադի մասնակցությունը Սիրիայում խաղաղ կարգավորման բանակցություններում, Մոգերինին նշել է, որ դրանում պետք է ընդգրկվեն կոնֆլիկտի բոլոր կողմերը:
Այդ կարծիքին է նաև Լյուքսեմբուրգի արտգործնախարար Ժան Ասելբորնը, ում երկիրը նախագահում է Եվրամիությունում:
Չնայած այն բանին, որ, ըստ նրա, Սիրիայի ապագան կապված չէ Ասադի հետ, երկրի ներկայիս նախագահը, ինչպես և Ռուսաստանը, պետք է ներառված լինեն պատերազմի դադարեցման բանակցություններում:
«Մենք գտնվում ենք անցումային փուլում, չի կարելի թույլ տալ վակուումի առաջացում»,- հայտարարել է Ասելբորնը:
Գերմանիայի արտգործնախարար Ֆրանկ-Վալտեր Շտայնմայերը նույնպես նշել է, որ Ռուսաստանի միջամտությունը սիրիական կոնֆլիկտում փոխել է իրավիճակն ու խաղաղ կարգավորման գործընթացը դարձրել ավելի բարդ:
Այդ պայմաններում, ըստ նրա, չափազանց կարևոր է ԱՄՆ-ի ու Ռուսաստանի համագործակցությունը ու հստակ գիտակցումը, թե «ով է իսկական թշնամին»:
Գերմանիայի ԱԳՆ ղեկավարի պնդմամբ՝ պայքարել պետք է ԴԱԻՇ-ի դեմ, այլ ոչ թե Ասադի դեմ հանդես եկող ընդդիմադիր խմբավորումների:
