Կրասնոդարի երկրամասում կրկեսի ձին հանդիսատեսի աչքի առաջ սպանել է կին ձիավարին
Ահասարսուռ դեպք է տեղի ունեցել Կրասնոդարի երկրամասի Աբրաու-Դյուրսո կրկեսում ձիավարության շոուի ժամանակ: Ձիավարուհիներից մեկը մահացել է ելույթի ժամանակ, հայտնում է ntv.ru-ն:
Հանդիսատեսից մեկը նկարահանել է մահացու ակրոբատիկ համարը: 24-ամյա Անաստասիա Մաքսիմովան վարժությունը կատարելիս ընկել է թամբից ու ոտքով կառչել ասպանդակից: Ձին շարունակել է վազել ու աղջկան քարշ տալ իր հետևից:
Կրկեսի աշխատակիցները փորձել են կանգնեցնել նժույգին, սակայն կենդանին հեռացել է կուլիսների հետևն ու մի քանի վայրկյան անց նորից ներխուժել է ու փորձել բարձրանալ տրիբունա:
Ստացած վնասվածքներից աղջիկը մահացել է շտապօգնության մեքենայում: Չճշտված տեղեկությունների համաձայն՝ շոուի սկզբում ձին հրաժարվել է դուրս գալ արենա, սակայն կազմակերպիչները կենդանուն ստիպել են: Հնարավոր է՝ հենց դա է դարձել ձիու ագրեսիվ վարքի պատճառը:
