«Ղարաբաղում պատերազմ պետք չէ ոչ Ռուսաստանին, ոչ Արևմուտքին». գերմանացի քաղաքագետ
«Ղարաբաղում պատերազմ պետք չէ ոչ Ռուսաստանին, ոչ Արևմուտքին»,- այս մասին այսօր «Ռեգիոն» հետազոտական կենտրոնի կազմակերպած առցանց հարցազրույցի ժամանակ ասաց «Վալդայ» ակումբի անդամ, գերմանացի հեղինակավոր քաղաքագետ Ալեքսանդր Ռարն` անդրադառնալով ԼՂ հակամարտության գոտում ստեղծված իրավիճակին և ՌԴ ԱԳ նախարար Սերգեյ Լավրովի, ԵԱՀԿ ՄԽ ամերիկացի համանախագահ Ջեյմս Ուորլիքի վերջին հայտարարություններին:
Նա նշեց, որ հարցն այն է, թե ԼՂ հակամարտության կարագավորում ասելով ինչ նկատի ունեն տարբեր երկրների քաղաքական գործիչները: «Կարծում եմ, որ Արևմուտքի հետաքրքրությունն այս տարածաշրջանում նոր պատերազմ թույլ չտալն է: Ռուսական հետաքրքրությունը` չվատթարացնել հարաբերությունները թե գործընկեր Հայաստանի, թե ռազմավարական գործընկեր Ադրբեջանի հետ: Կարծում եմ, որ ներկայիս ստատուս քվոն գործընթացի մասնակիցների մեծամասնությանը ձեռնտու է»,- նշեց Ալեքսանդր Ռարը` շարունակելով, որ Ռուսաստանին և Արևմուտքին անհրաժեշտ չէ լարվածության նոր օջախ: Նրա խոսքով`կա Դոնբասը, ԻՊ-ը, Սիրիան, իսկ Արևմուտքը հոգնել է ռազմական հակամարտություններից:
«Գործարկվելու է աստիճանաբար կարգավորման դիվանագիտությունը»,- նկատեց Ռարը:
