Մինչև հուլիսի վերջ՝ սահմանադրության բարեփոխված առաջին տարբերակը կլինի
Սահմանադրական բարեփոխումների մասնագիտական հանձնաժողովը ներկայումս փորձագետների հետ քննարկում է Վիեննայում Վենետիկի հանձնաժողովի աշխատանքային խմբի հետ հանդիպման արդյունքները: Ամփոփվելու է Սահմանադրության նախագծի հիմնական մասը՝ Ազգային ժողովին, Հանրապետության նախագահին ու կառավարության և դատական իշխանության ու Մարդու իրավունքների պաշտպանին վերաբերող գլուխները (4-7 և 10-րդ):
Սահմանադրական բարեփոխումների մասնագիտական հանձնաժողովի անդամ, «Հայաստանի իրավաբանների ասոցիացիա» հ/կ-ի նախագահ, ԵՊՀ իրավագիտության ֆակուլտետի դեկան Գագիկ Ղազինյանը 168.am-ին տեղեկացրեց, որ քննարկվող գլուխների վերաբերյալ վերջնական արդյունքներն ուղարկվելու են Վենետիկի հանձնաժողով՝ միջանկյալ եզրակցության համար:
«Ենթադրում եմ, որ մինչև ամսվա վերջ ամբողջ նախագիծը, գոնե առաջին տարբերակով, արդեն կլինի»,- ասաց Գ.Ղազինյանը՝ հավելելով, որ, ըստ ժամանակացույցի՝ փաստաթուղթն ԱԺ պետք է ներկայացվի օգոստոսին:
