«Սերժ Սարգսյանը իր մունետիկի՝ Նազարյան Ռոբերտի միջոցով կայացրեց հանցավոր որոշում»
Այս պահին Ազատության հրապարակը կրկին բազմամարդ է: Քիչ առաջ մեկնարկեց «Ո՛չ թալանին» նախաձեռնության բողոքի ակցիան, որին հաջորդելու է պահանջատիրական մեծ երթը՝ ընդդեմ էլեկտրաէներգիայի սակագնի թանկացման:
Հիշեցնենք, որ հունիսի 17-ին Հանրային ծառայությունները կարգավորող հանձնաժողովը հաստատել է էլեկտրաէներգիայի սակագնի թանկացումը 6.93 դրամով: Ակցիայի մասնակիցների խոսքով՝ իրենք չեն պատրաստվում ոչ մի լումա ավել վճարել, քանի որ ներկայիս սակագինն էլ արդեն իսկ «ապօրինի» է:
Նշենք, որ քաղաքացիական նախաձեռնության կազմակերպած բողոքի ակցիային մասնակցում են տարբեր քաղաքական ուժերի ներկայացուցիչներ, քաղաքացիական նախաձեռնություններ, քաղաքացիներ: Նրանց են միացել նաև «Նաիրիտ» գործարանի նախկին աշխատակիցները: Այստեղ են եկել նաև մարդիկ հանրապետության տարբեր մարզերից:
Ակտիվիստներն «Ազատության» հրապարակ են եկել տարբեր գրառումներով պաստառներով՝ «Լույսդ մարենք հավիտյան, առանց դատ ու դատաստան», «քաղաքացու քացին միահեծան ՀԷՑ-ին», «գրողի ծոցը սննկացումը, ՀԷՑ-ին կփրկի ազգայնացումը» և այլն:
«100-ամյակն առանց ռեժիմի» շարժման ղեկաար Ժիրայր Սէֆիլյանը լրագրողների հետ զրույցում ասաց, որ այս հարցի լուծումը միանշանակ քաղաքական է լինելու, բայց իրենք խրախուսում են յուրաքանչյուր այսպիսի քաղաքացիական նախաձեռնություն: Նա ասաց, որ իրենք այնպես են անելու, որ քաղաքացիական շարժման պայքարը չմարի, հակառակը՝ ավելի ուժեղանա:
«Ոչ թալանին» նախաձեռնության անդամ Մաքսիմ Սարգսյանն ասաց, որ իրենք հավաքվել են՝ ցույց տալու համար, թե ով է այս երկրի որոշողը. «Որոշողը մենք ենք: Մենք չենք հանդուրժելու ժողովրդի կեղեքումն ու թալանը»:
Նախաձեռնության մեկ այլ անդամ Արամ Մանուկյաննն էլ հայտարարեց, որ սա ՀՀ քաղաքացու պայքարն է՝ անկախ քաղաքական և կուսակցական հայացքներից:
«Որոշվեց, որ պայքարը պետք է տանել միայն փողոցներում՝ առանց երկխոսության իշխանությունների հետ: Սա խնդիր է, որը վերաբերվում է բոլորին, և ողջունել ենք յուրաքանչյուն նախաձեռնություն: Մեր պահանջներն ուղղված էին Սարգսյան Սերժին և Աբրահամյան Հովիկին: Հոսանքի ոչ մի լումա չպետք է թանկանար, եղած սակագինն էլ պետք է վերանայվեր: Ներկա սակագինն արդեն իսկ բարձր է: Սարգսյան Սերժը իր մունետիկի՝ Նազարյան Ռոբերտի միջոցով կայացրեց հանցավոր որոշում: Մենք չեն թույլ տալու անտեսել ժողովրդի արդարացի պահանջը»,- հայտարարեց նախաձեռնության անդամը, որին հաջորդեցին «Սերժիկ Հեռացիր» կոչեր:
Նրանք հայտարարեցին, որ այստեղ հավաքվել են, որպեսզի տեր կանգնեն իրենց պահանջներին և իրավունքերին. «Մենք այս իշխանությունների ստրուկները չենք»:
