Քանաքեռավան-Մրգաշեն-Արտամետ-Նոր Գեղի հանրապետական նշանակության ճանապարհը հիմնանորոգվում է

Կոտայքի մարզի Քանաքեռավան-Մրգաշեն-Արտամետ-Նոր Գեղի գյուղերն իրար կապող հանրապետական նշանակության ավտոճանապարհը վերջին անգամ հիմնանորոգվել էր տասնամյակներ առաջ։ Ճանապարհի քիչ թե շատ բարվոք վիճակը մինչ այժմ պահպանվում էր փոսային նորոգումներով:

2014թ. ՀՀ կառավարությունը պետական բյուջեից գումար տրամադրեց այս ճանապարհահատվածի հիմնանորոգման համար: 4,6 կմ երկարությամբ ճանապարհի վերականգնման աշխատանքները սկսվեցին անցյալ տարի՝ Մրգաշեն գյուղի 1,6 կմ երկարությամբ հատվածից: Այս ճանապարհին առկա ջրանցքները հատող երկու կամուրջների հիմնանորոգումը ևս ավարտվել է 2014-ին։ Ճանապարհի մնացած մասը, որը նախորդից կրկնակի երկար է, ճանապարհաշինարարները պետք է կառուցեն մինչև ամռան ավարտը:

030620153

Ճանապարհի հիմնանորոգող «Տեր Հայրապետյան շին» ՍՊ ընկերության գլխավոր ինժեներ Մարզպետ Մելքոնյանի խոսքով՝ ճանապարհածածկի հիմնանորոգման աշխատանքները կավարտվեն 15 օրվա ընթացքում։ Դրանից հետո արդեն կիրականացվեն կողնակների, մուտքերի, իջատեղերի ասֆալտապատման, ճանապարհի նշագծման և կահավորման աշխատանքներ։

Ճանապարհի հիմնանորոգման աշխատանքները նախատեսվում է ավարտել նախանշված ժամկետից շուտ։ Դրա համար առկա են բոլոր անհրաժեշտ պայմանները, տեխնիկան և աշխատուժը: Գրեթե ամեն օր շինհրապարակում են լինում նաև ՀՀ տրանսպորտի և կապի նախարարության «Տրանսպորտի ԾԻԳ» պետական հիմնարկի մասնագետները: Մեր այցի ժամանակ, օրինակ, աշխատանքներին հետևում էր տնօրենը՝ Էմիլ Սարգսյանը: Նա նշեց, որ շինարարության ավարտից հետո ունենալու ենք շատ որակյալ ճանապարհ:

030620158

«Իրականացվում է ամենօրյա տեխնիկական հսկողություն, որի մասին պարբերաբար զեկուցվում է ՀՀ տրանսպորտի և կապի նախարար Գագիկ Բեգլարյանին: Կատարվում են անհրաժեշտ բոլոր փորձարկումները, ուստի որակի հետ կապված որևէ խնդիր բացառում ենք»,- մանրամասնեց է. Սարգսյանը:

«ՀՀ նախագծերի պետական փորձաքննություն» ՓԲ ընկերության աշխատակից, փորձաքննություն իրականացնող Արտակ Թովմասյանն էլ հավելեց, որ ճանապարհների շինարարության տեխնիկական հսկողությունը կատարվում է ամենօրյա չափագրումների միջոցով։ Դրանից բացի, իրականացվում են լաբորատոր փորձարկումներ, որից հետո թույլատրվում է ասֆալտաբետոնե խառնուրդ ստանալ, և միայն խառնուրդի փորձանմուշի լաբորատոր փորձարկումից հետո ասֆալտաբետոնե խառնուրդը մեքենաներով տեղափոխվում է շինհրապարակ:

Արդեն փռված ասֆալտի տարբեր հատվածներից, պատահականության սկզբունքով, վերցվում են փորձանմուշներ, որոնք ևս անցնում են լաբորատոր փորձարկման փուլ: Դրական արդյունքի դեպքում միայն տրվում է ճանապարհի շահագործման թույլտվություն:

0306201591

Անդրադառնալով կառուցվող ճանապարհահատվածին՝ Ա. Թովմասյանը հավաստիացրեց, որ ճանապարհի որակը համապատասխանում է շինարարական բոլոր ստանդարտներին: Նա նաև նկատեց, որ այսօր կառուցվող ճանապարհների որակը շատ ավելի բարձր է, քան, օրինակ, մեկ տասնամյակ առաջ, ինչը նոր տեխնոլոգիաների, մեքենամեխանիզմների օգտագործման, ինչպես նաև ավելի պրոֆեսիոնալ ճանապարհաշինարարների առկայութան արդյունք է:

Խստացվել են նաև ճանապարհը կառուցող ընկերություններին ներկայացվող պահանջները, ինչից միայն շահում է ճանապարհի որակը:

Միջպետական և հանրապետական նշանակության ճանապարհների հիմնանորոգումն այս պահին շարունակվում է նաև հանրապետության մյուս մարզերում: Ֆինանսական միջոցները տրամադրվել են ՀՀ պետական բյուջեից և Համաշխարհային բանկի կողմից:

030620159