ՆԱՏՕ-ին լրջորեն մտահոգել է Կալինինգրադի մարզում «Իսքանդեր-Մ» հրթիռային համալիրներ ծավալելը
Ռուսական ТАСС լրատվական գործակալության փոխանցմամբ` Կալինինգրադի մարզում «Իսքանդեր-Մ» հրթիռային համալիրներ ծավալելը լրջորեն կփոխի Եվրոպայում անվտանգության հավասարակշռությունը:
Այս մասին Վաշինգտոնում գործող Ռազմավարական ու միջազգային հետազոտությունների կենտրոնում հայտարարել է ՆԱՏՕ-ի գլխավոր քարտուղար Յենս Սթոլթենբերգը.
«Դա («Իսքանդերի» ծավալումը տարածաշրջանում) արմատականորեն կփոխի անվտանգության հավասարակշռությունը Եվրոպայում»: Սթոլթենբերգը Մոսկվայի այդ գործողությունները որակել է որպես ապակայունացնող ու վտանգավոր:
Նա հավելել է, որ ՆԱՏՕ-ն չի ցանկանում խորացնել Ռուսաստանի հետ դիմակայությունը: Ռուսաստանի նախագահի մամլո քարտուղար Դմիտրի Պեսկովն անտեղի է համարել Յենս Սթոլթենբերգի այն խոսքերը, որ Ռուսաստանը զորավարժությունների պատրվակով զորքեր է տեղափոխում հարևան երկրներ:
