Պուտինը Պետդումայի վավերացմանն է ներկայացրել Հարավային Օսիայի հետ դաշնակցության ու ինտեգրման մասին պայմանագիրը
Ռուսական РИА Новости լրատվական գործակալության փոխանցմամբ՝ Ռուսաստանի նախագահ Վլադիմիր Պուտինն այսօր Պետդումայի դիտարկմանն է ներկայացրել Հարավային Օսիայի հետ դաշնակցության ու ինտեգրման մասին պայմանագրի վավերացման վերաբերյալ օրինագիծը:
Կողմերն այդ պայմանագիրը ստորագրել են 2015 թվականի մարտի 18-ին, Մոսկվայում: Օրինագծի տեքստը հրապարակվել է Ռուսաստանի խորհրդարանի Ստորին պալատի տեղեկատվական բազայում:
Ավելի վաղ Պուտինը Դաշնության խորհրդում այդ փաստաթղթի դիտարկման ժամանակ իր ներկայացուցիչ էր նշանակել փոխարտգործնախարար Գրիգորի Կարասինին:
Օրինագծին կից բացատրագրում նշված է, որ պայմանագրում կողմերն ամրագրում են իրենց մտադրությունը՝ սոցիալական, տնտեսական ու հումանիտար, ինչպես նաև պաշտպանական ու անվտանգության ոլորտներում փուլ առ փուլ ավելի սերտ համագործակցություն հաստատելու համար:
Ընդգծվում է, որ պայմանագիրն ամբոջովին համապատասխանում է ռուսական կողմի շահերին և կոչված է դառնալ հիմք՝ նշված ուղղություններով առանձին համաձայնագրեր ստորագրելու համար:
