Կահիրեի դատարանը Մուրսիին դատապարտել է մահվան
Բրիտանական Reuters լրատվական գործակալության փոխանցմամբ` Կահիրեի դատարանը Եգիպտոսի նախկին նախագահ Մուհամմեդ Մուրսիին ու «Մուսուլման եղբայրներ» շարժման 105 կողմնակիցների դատապարտել է մահվան:
Դատավճիռը կայացվել է երկու գործով, որոնցից մեկն առնչվում է 2011 թվականին բանտից «Մուսուլման եղբայրներ» շարժման առաջնորդների զանգվածային փախուստից, իսկ մյուսը` օտար պետության օգտին լրտեսությանն ու պետական դավաճանությանը:
Պետական դավաճանության մասին գործում չի շոշափվել Մուրսիի անունը, նրան մահվան են դատապարտել բանտից փախչելու համար: Բանտից զանգվածային այդ փախուստը, որին մասնակցել է Մուրսին, տեղի է ունեցել եգիպտական հեղափոխության օրերին` 2011 թվականի հունվարի 25-ին:
Դատարանի կայացրած մահվան դատավճիռը դեռ պետք է հաստատի Եգիպտոսի գերագույն մուֆթի Շաուկի Ալլամը:
