Վրաստանում կստեղծվի Պետական անվտանգության ծառայություն
Sputnik լրատվական գործակալության փոխանցմամբ` Վրաստանի ներքին գործերի նախարար Վախթանգ Գոմելաուրին այսօր կառավարության նիստում ներկայացրել է գերատեսչության բարեփոխման նախագիծը, որը նախատեսում է Պետական անվտանգության ծառայության ստեղծում:
Նախարարն ընդգծել է, որ ՆԳՆ-ի մասնատումը հանդիսացել է 2012 թվականի հոկտեմբերին Վրաստանում իշխանության եկած «Վրացական երազանք» դաշինքի նախընտրական խոստումներից մեկը.
«Վրաստանի ՆԳՆ-ը ներկայացրել է օրինագիծ, որը դիտարկվել ու ընդունվել է կառավարության նիստում: Այն նախատեսում է նոր ծառայության` Պետական անվտանգության ծառայության ստեղծում, որում կընդգրկվեն հատուկ ծառայությունները, ինչպիսիք են հակահետախուզությունը, հակաահաբեկչական կենտրոնն ու հակակոռուպցիոն ծառայությունը:
Ծառայության ղեկավարը կընտրվի վեցամյա ժամկետով, ընդ որում` նույն մարդը չի կարող երկու անգամ անընդմեջ գլխավորել Պետանվտանգության ծառայությունը»: ՆԳՆ-ի մասնատման մասին օրինագիծը պետք է հաստատվի խորհրդարանի կողմից:
