Կալիֆորնիայում ձերբակալվել են երկու տասնյակ հայեր
BBC-ի ռուսական ծառայության փոխանցմամբ՝ Կալիֆորնիայի Հյուսիսային օկրուգի դատախազությունը քրեական գործ է հարուցել 33 մարդու դեմ, որոնց թվում կան երկու տասնյակ հայեր:
Նրանք մեղադրվում են դեղորայքի ապօրինի առևտուր ծավալելու, անձնական տվյալներ հափշտակելու և պատվերով սպանության փորձեր ձեռնարկելու մեջ:
Եթե դատարանում ապացուցվի նրանց մեղավորությունը, ապա ամբաստանյալներին կսպառնա 35-95 տարվա ազատազրկում, իսկ Արա Կարապետյանին ու Գևորգ Տեր-Մկրտչյանին՝ ցմահ ազատազրկում:
Իշխանությունները հանցավոր դավի առանցքային մասնակիցներ են համարում նաև 29-ամյա գործարար Միհրան Ստեփանյանին ու նրա ազգական, 38-ամյա Արթուրին և պաշտոնապես նրանց անվանում են «Կարապետյան-Ստեփանյաների խմբավորում»:
Նախորդ շաբաթվա վերջին ձերբակալվել է 32 ամբաստանյալ, իսկ 33-րդի նկատմամբ հայտարարվել է հետախուզում:
