Արագածի բուքը խթանում է գիտությունը
Այս օրերին Արագածի կայանում եղանակային անբարենպաստ պայմաններ են: Տեղ-տեղ ձյան բարձրությունը հասնում է երկու մետրից ավելի, որի հետևանքով շենքերն ու տնակները հայտնվել են ձյան հաստ շերտերի տակ, փակվել են բացված ճանապարհները: Այս բոլորը ստեղծում են բացառիկ դժվար պայմաններ կայանի սարքավորումների անխափան և հուսալի աշխատանքներն ապահովելու համար, որոնք 
տեղաբաշխված են մեծ մակերեսով: Ա. Ալիխանյանի անվան ազգային գիտական լաբորատորիայի (ԵրՖԻ) հասարակայնության կապերի խմբի ղեկավար Զառա Ասատուրյանի խոսքով կայանի երիտասարդ գիտաշխատակիցներ Սամվել Պարսամյանը, Արա Բաբայանը և Գուրգեն Ջաբարյանը ջանք չեն խնայում այս դժվարին պայմաններում ապահովելու կայանի հուսալի աշխատանքը, որի արդյունքում ապրիլի 20-ին հաջողվեց ամպրոպային ամպերից գրանցել անսպասելի մեծ քանակությամբ գամմա քվանտների և էլեկտրոնների հոսքեր, որոնք 10 անգամ գերազանցում էին ֆոնային մակարդակը:
Գիտնականները վստահեցնում են, որ ստացված տվյալները կօգնեն բացահայտել բարձր էներգիաների մթնոլորտային ֆիզիկայի չլուծված կարևորագույն հարցերը:
Նյութը հրապարակման պատրաստեց ՍՈՆԱ ՖԱՐՄԱՆՅԱՆԸ
