Հայաստանն ու Եվրոպական միությունը մտքեր են փոխանակում, չեն բանակցում. Կարեն Նազարյան
«ՀՀ-ԵՄ հարաբերությունները զարգացնելու հարցում Հայաստանը կաշկանդված չէ»,- այսօր լրագրողների հետ ճեպազրույցի ընթացքում այս մասին հայտարարեց ՀՀ ԱԳ նախարարի տեղակալ Կարեն Նազարյանն` արձանագանքելով օրերս ԵՄ ներկայացուցիչ Մայա Կոչիյանչիչի և ԵՄ այլ պաշտոնյաների դիտարկումներին, թե ԵՄ-ՀՀ հարաբերություններում գնդակը ՀՀ դաշտում է և այսուհետ ՀՀ-ն պետք է հանդես գա իր առաջարկներով:
Նա նշեց, որ ՀՀ-ԵՄ հարաբերություններում ՀՀ տեսլականի մասին մեկ անգամ չէ, որ հայտարարվել է: Պաշտոնյան հղում կատարեց Վիլնյուսյան գագաթնաժողովում ՀՀ-ԵՄ ընդունած հռչակագրին ու դրանում ամրագրված դրույթներին՝ ՀՀ-ԵՄ հարաբերությունների խորացման վերաբերյալ: Կարեն Նազարյանը վստահեցրեց, որ Հայաստանն անկաշկանդ զարգացնում է իր հարաբերությունները ԵՄ-ի հետ:
«Մենք գտնվում ենք մտքերի փոխանակման փուլում մի շարք կարևորագույն հարցերի շուրջ: Խոսքը ոչ թե նոր փաստաթղթի մասին է, այլ մենք հիմա մտքերի փոխանակման փուլում ենք և քննարկում ենք հարաբերությունների նոր իրավական շրջանակի ձևավորման հարցը: Այստեղ խոսքը բանակցությունների մասին չէ, կարևոր է հստակեցնել, խոսքը հենց մտքերի փոխանակման մասին է»,- ընդգծեց փոխնախարարը: Վերջինս հրաժարվեց անդրադառնալ ԵՄ Արևելյան գործընկերության՝ Ռիգայում կայանալիք գագաթնաժողովից սպասելիքներին, ասելով, որ դիվանագիտության ոլորտում կանխատեսումներ անելն անշնորհակալ գործ է:
