Րաֆֆի Հովհաննիսյան. «Մենք մտնում ենք մի փուլ, որը տանում է դեպի հրապարակ»
Փետրվարի 8-ին «Ժառանգություն» կուսակցության գրասենյակում տեղի ունեցավ «Հայք» երիտասարդական-ուսանողական միության հանձնախմբի հերթական նիստը , որին ներկա էին նաեւ «Ժառանգություն» կուսակցության նախագահ Րաֆֆի Հովհաննիսյանը եւ ԱԺ համանուն խմբակցության պատգամավոր Զարուհի Փոստանջյանը:
Ողջունելով երիտասարդներին՝ Հովհաննիսյանը կոչ արեց լինել առավել ակտիվ, քանի որ հասունացել է միասնական պայքարի ժամանակը՝ հաշվի առնելով վերջին շրջանում ծավալված զարգացումները: «Մենք մտնում ենք մի փուլ, որը տանում է դեպի հրապարակ եւ որը բաց է բոլոր ուժերի համար»,- ասաց «Ժառանգության» առաջնորդը:
Ողջույնի խոսքով հանդես եկավ նաեւ Փոստանջյանը, ում հետ անմիջական զրույց ծավալվեց կուսակցության երիտասարդական կառույցի առաջիկա ծրագրերի, ինչպես նաեւ Հայոց ցեղասպանության 100-րդ տարելիցի հետ կապված անելիքների մասին:
Վերջում Րաֆֆի Հովհաննիսյանը եւ Զարուհի Փոստանջյանը պատասխանեցին երիտասարդներին հուզող հարցերին, որոնք հիմնականում վերաբերում էին երկրի վաղվա օրվա առանցքային խնդիրներին, ներքին ու արտաքին քաղաքականության ոլորտներում առկա մարտահրավերներին:
Նախօրեին Գյումրի եւ Վանաձոր կատարած այցելությունների ժամանակ Րաֆֆի Հովհաննիսյանն ու կուսակցության վարչության անդամները նմանատիպ հանդիպում ունեցան տեղական կառույցների երիտասարդության հետ:
Հանդիպումներին մասնակցում էին ավելի քան հիսուն երիտասարդներ` վարչության նորընտիր անդամ Հովսեփ Ղազարյանի համակարգմամբ:
«Ժառանգություն» կուսակցության լրատվական ծառայություն
