Բերդաշենի ենթաշրջանի գյուղերի համար այլ ճանապարհ են ընտրում

Անցած տարի հանրապետության ավտոճանապարհների վերանորոգման, վերակառուցմանը պետբյուջեից ուղղվել է շուրջ 2 մլրդ 500 մլն դրամ։

ԼՂՀ քաղաքաշինության նախարար Կարեն Շահրամանյանի փոխանցմամբ՝ տարվա ընթացքում ասֆալտբետոնե նոր ծածկեր են կառուցվել Ստեփանակերտ-Բերձոր ճանապարհի 1.6 կմ-անոց, Ստեփանակերտ-Կարմիր Շուկա՝ 2.8 կմ-անոց, Ստեփանակերտ-ՆՆգի-Մարտունի՝ 3 կմ-անոց հատվածներում, իրականացվել են նաեւ փոսային վերանորոգման աշխատանքներ։

Ավարտվել են Ստեփանակերտ-Ասկերան մայրուղուց Իվանյան եւ Նորագյուղ տանող 2.3 կմ-անով ճանապարհահատվածի կառուցման աշխատանքները, Հադրութի շրջանի Մեծ Թաղեր գյուղ տանող ավտոճանապարհի ասֆալտապատումը՝ մոտ 3.6 կմ։
«Իսկ այս տարի էլ ավարտելու ենք Ննգի –Մարտունի ընդհանուր 39.6 կմ ճանապարհահատվածի կապիտալ վերակառուցման աշխատանքները»,տեղեկացրել է քաղշիննախարարը։

Լրագրողներին հետաքրքրում էր, թե երբ է վերանորոգվելու Ակնա (Աղդամ)-Մարտունի ճանապարհահատվածը։ Հարցին ի պատասխան Կարեն Շահրամանյանը ասել է, որ այդ հարցը օրակարգում էր, սակայն ֆինանսական խնդիրների պատճառով այն հանվեց։ Փոխարենը մտածում են այլ ճանապարհի վերակառուցման ուղղությամբ՝ Ննգի- Մարտունի ճանապարհահատվածի Գիշիի խաչմերուկից դեպի Եմիշճան, Բերդաշեն տանող ճանապարհի, որից էլ կօգտվեն նաեւ ենթաշրջանի մյուս գյուղերը։

Հարցին, թե ի՞նչ է լինելու «Հայաստան» համահայկական հիմնադրամի հովանավորությամբ կառուցված «Հյուսիս-Հարավ» ավտոճանապարհի հետ, որի վիճակը, մեղմ ասած, բարվոք չէ, նախարարը պատասխանել է, որ մի մասը վերանորոգել խոստացել է «Բեյզ Մեթըլս» ընկերությունը, իսկ մյուս մասը կարվի կառավարության կողմից, այդ թվում այն փոքր հատվածների ասֆալտապատումը, որն այդպես էլ մինչեւ հիմա չի արվել։