«Որևէ խոսք իր արժեքը կորցրել է, պետք է գնալ գործողությունների». Ռուբիկ Հակոբյան
Այսօր Ազգային ժողովում ճեպազրույցների ժամանակ «Ժառանգություն» խմբակցության Ռուբիկ Հակոբյանը վստահեցրեց, որ ինչպես «Ժառանգության» ներկայացուցիչների, այնպես էլ ԲՀԿ-ականների մոտ տրամադրությունների փոփոխություն չի նկատել: Նա նշեց, որ քաղաքական ուժերը մարզային այցերի ժամանակ հայտարարել են, որ արմատական փոփոխության կարիք կա, և մոտեցումներում փոփոխություն չի եղել: Ռ.Հակոբյանի խոսքով՝ դեռ կան որոշ չհամաձայնեցված հարցեր, բայց շարժման հիմնական նպատակը իշխանափոխությունն է:
«Դրված է իշխանափոխության հարց և մենք ավելի շատ ուշադրություն ենք դարձնում նպատակին, քան լոզունգներին: Երբեմն քաղաքական ուժերն ավելի շատ լոզունգներին են ուշադրություն դարձնում ու պարտվում են: Երբ տեսնենք, որ կարող ենք, այդ իշխանափոխության լոզունգը կդարձնենք մեր լոզունգը»,- ասաց Ռ.Հակոբյանը:
Ըստ նրա՝ հաջորդ գործողությունները պայմանավորվում են այսօրվա հանրահավաքի ընթացքով. «Որևէ խոսք իր արժեքը կորցրել է, պետք է գնալ գործողությունների: Մենք հույս ունենք, տրամադրված ենք, որ այսօրվա միտինգը չի լինի գեղեցիկ խոսքերի հանրահավաք»:
Անդրադառնալով Զարուհի Փոստանջյանի առաջադրած օրակարգին՝ Ռ.Հակոբյանը նշեց, որ դա նրա անձնական նախաձեռնությունն էր, չի քննարկվել կուսակցության վարչության նիստում, բայց չի բացառվում, որ հետո կքննարկվի։
