Բախվել են Opel-ն ու «Նիվա»-ն. 6-ամյա աղջիկը գտնվում է վերակենդանացման բաժանմունքում (լուսանկարներ)
Այսօր՝ մայիսի 25-ին, ավտովթար է տեղի ունեցել Երևանում: Ժամը 14:00-ի սահմաններում Աճառյան փողոցի և Առինջի գյուղի կամարի մոտ բախվել են Առինջ գյուղի բնակիչ, 32-ամյա Արտավազդ Բարսեղյանի վարած ВАЗ 2121 մակնիշի 03 ՏՍ 585 համարանիշի և Արարատի մարզի Շահումյան գյուղի բնակիչ, 52-ամյա Յուրի Պետրոսյանի վարած Opel մակնիշի Լ 6080 համարանիշի ավտոմեքենաները։
Ինչպես վթարի վայրից հայտնում է shamshyan.com-ը, վթարի հետևանքով Opel-ի ուղևոր, 6-ամյա Է. Պետրոսյանը մարմնական վնասվածքներով տեղափոխվել է «Սուրբ Աստվածամայր» բժշկական կենտրոն, այս պահին նա գտնվում է վերակենդանացման բաժանմունքում։ Վթարի վայրում քննչական աշխատանքները ղեկավարում է Ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի ավագ քննիչ Արսեն Մարգարյանը, ում հանձնարարականով, մեքենաները տեղափոխվում են Երևանի ՃՈ հատուկ պահպանվող տարածք։ Ֆոտոլրագրողը հայտնում է, որ Opel-ի վարորդն ու ուղևորը հայր ու աղջիկ են։
