«Ժառանգության» կողմից հրատապ ճանաչված օրինագծին ընդդիմանում է միայն մեծամասնությունը
Ազգային ժողովի այսօրվա երկրորդ նիստում կառավարության ծրագրի քննարկումն ընդմիջվեց՝ «Ժառանգություն» խմբակցության կողմից հրատապ ճանաչված ՀՀ ընտրական օրենսգրքում փոփոխություններ և լրացումներ կատարելու մասին օրինագիծը քննարկելու համար: Վերջինս ԱԺ օրակարգում ընդգրկվելու համար չէր արժանացել Պետական-իրավական հարցերի մշտական հանձնաժողովի դրական եզրակացությանը:
Նախագծով առաջարկվում է ընտրությունների արդյունքների նկատմամբ հանրության վստահությունը բարձրացնելու նպատակով ընտրությունների ավարտից հետո 2 օրվա ընթացքում ընտրողների ստորագրած ցուցակները հրապարակել Կենտրոնական ընտրական հանձնաժողովի պաշտոնական կայքէջում՝ ըստ տեղամասերի որոնման և ներբեռնման հնարավորությամբ:
Այս փոփոխությանը հիմնական ընդդիմախոսը քաղաքական մեծամասնությունն էր, որը որպես հիմնավորում նշեց մասնակցության գաղտնիության սկզբունքի խախտումը, այդ հարցով Սահմանադրական դատարանի որոշումը և Եվրոպայի խորհրդի Վենետիկի հանձնաժողովի կարծիքը:
«Ժառանգություն» խմբակցության անդամ Ալեքսանդր Արզումանյանն էլ հայտարարեց, որ Սահմանադրական դատարանի որոշումները «Քրիստոսի ուղիների պես անքննելի են», ուստի առաջարկեց օրենսդրական փոփոխություն կատարել և լուծարել այդ կառույցը:
