Ինչո՞ւ են այժմ հրապարակվում հոկտեմբերի 27-ի գործով Ռոբերտ Քոչարյանի ցուցմունքները. Վ.Սողոմոնյանի մեկնաբանությունը
Ինչպե՞ս են գնահատում Հոկտեմբերի 27-ի գործում Ռոբերտ Քոչարյանի ցուցմունքների հրապարակումը այս օրերին ՀՀ երկրորդ նախագահի գրասենյակը: Այս հարցով ԳԱԼԱ-ն դիմել է Ռ. Քոչարյանի գրասենյակի ղեկավար Վիկտոր Սողոմոնյանին։
«Ես, անկեղծ ասած, տրամաբանության մասով չեմ ուզում դատողություններ անել, տրամաբանության վերաբերյալ այդ լրատվամիջոցներին պիտի հարցնել, որոնք դրանք տպագրում են: Մեր մասով ասեմ՝ ես խնդիր չեմ տեսնում, որ այդ ցուցմունքները հրապարակվում են: Եթե չեմ սխալվում, դատավարությունը բաց է եղել եւ այդ նյութերը՝ հրապարակային, եւ ես խնդիր չեմ տեսնում: Եթե այդ ցուցմունքները հրապարակվում են ամբողջությամբ, ի նկատի ունեմ՝ եթե արժանահավատ են, եւ տեքստերը պահպանված են, ես խնդիր չեմ տեսնում, որպեսզի հասարակությունը կամ հասարակության այն հատվածը, որոնց հետաքրքիր է, այդ տեքստերի հետ ծանոթանան:
Ինչ վերաբերում է նրան, թե դրանք որքանով են պայմանավորված քաղաքական գործոնով, Վ. Սողոմոնյանը պատասխանեց.
«Ես չէի ուզենա դատողություններ անել: Ասեմ, որ եթե ես ճիշտ եմ հասկացել՝ դրանք ամբողջությամբ են հրապարակվում: Իսկ դատողությունների հետ կապված՝ ես չէի ուզենա վերլուծել, գուցե այն լրատվամիջոցներին հարցնեք՝ ինչո՞ւ են տպագրում»:
