«Եթե ինձ կամ իմ ազգականների հետ վատ բան պատահի, ապա Գյումրու ոստիկանության աշխատակիցների կազմակերպածն է»
Գյումրիում հնչած կրակոցների օրը՝ ապրիլի 23-ին, այդ գործի վկաներից մեկի փաստաբան, փաստաբանների պալատի անդամ Թամարա Յայլոյանին Գյումրու ոստիկանության աշխատակիցները վիրավորել և սպառնալիքներ են հնչեցրել իր մասնագիտական գործունեությունը կատարելու ժամանակ: Այս մասին galatv.am-ին ասել է փաստաբանը:
Թամարյա Յայլոյանը Գյումրու կրակոցների գործի քննության ժամանակ ներկայացել է որպես վկա՝Վարդան Ղուկասյանի եղբորորդու՝ Կոլյա Ղուկասյանի փաստաբան:
«Ապրիլի 23-ին Գյումրու ոստիկանությունում մասնագիտական գործունեությունս կատարելու ժամանակ են սպառնացել ինձ՝ Գյումրու ոստիկանության աշխատակիցները, որի վերաբերյալ ես, իհարկե, դիմում եմ ներկայացրել փաստաբանների պալատ եւ մտադիր եմ նաեւ առանձին հայտարարություն կատարել այն կապակցությամբ, որ եթե որևէ մեղադրանք առաջադրվի իմ նկատմամբ, կամ եթե որևէ բան պատահի իմ կամ իմ ազգականների հետ, Գյումրու ոստիկանության աշխատակիցների կողմից է կազմակերպված»,- «Գալա»-ին փոխանցել է Թամարա Յայլոյանը:
Հարցին, թե ինչ սպառնալիքներ են հնչել և ինչու՞, Թամարա Յայլոյանը պատասխանել է. «Գլխիդ կսարքենք, վատ բան կլինի և այլն: Ես հանդիսացել եմ Կոլյա Ղուկասյանի փաստաբանը, այսինքն՝ ինքը վկայի կարգավիճակով էր, ես ներկայացրել եմ նրա շահերը: Այդ գործողությունները, որ քննիչն ավարտել է, փորձել եմ ճշտել՝ կարո՞ղ ենք գնալ, թե՞ ոչ: Ոստիկանությունը ինձ թույլ չտվեց տեսնել Կոլյա Ղուկասյանին, որպեսզի ճշտեմ՝ կարող եմ մնալ, թե գնալ, և իրենք սպառնացին, որ ես չմասնակցեմ այդ գործերին, այլապես ինձ հետ վատ բաներ կպատահեն: Ինձ ասում էին՝ որտեղ կրակոցներ լինում են, ես ներկայանում եմ և այլն»:
