Մեղադրանքի 5 դրվագներն անէացան

Ապարան քաղաքի բնակիչ Գևորգ Եզնակյանին 21.03.2012թ. մեղադրանք էր առաջադրվել ՀՀ քրեական օրենսգրքի 178-րդ հոդվածի 2-րդ մասի 1-ին և 2-րդ կետերով, նրա նկատմամբ 09.11.2012թ. հայտարարվել էր հետախուզում, իսկ որպես խափանման միջոց կիրառվել էր կալանավորումը և քրեական գործով վարույթը 21.11.2012թ. կասեցվել:

22.01.2013թ. Գևորգ Եզնակյանը հայտնաբերվել է, գործի կասեցված վարույթը վերսկսվել, 24.01.2013թ. նրա կալանավորման հարցը կրկնակի քննարկվել և վերահաստատվել, իսկ նրան առաջադրված մեղադրանքը փոփոխվել է և առաջադրվել նոր մեղադրանք ՀՀ քրեական օրենսգրքի 178-րդ հոդվածի 1-ին մասով` 2 դրվագով, 178-րդ հոդվածի 2-րդ մասի 2-րդ կետով` 2 դրվագով և 178-րդ հոդվածի 2-րդ մասի 1-ին և 2-րդ կետերով:

Գևորգ Եզնակյանը մեղադրվում էր, մասնավորապես, Հայաստանում թափ առնող կամ թափ առած հանցագործության կատարման՝ խարդախությամբ կեղծ ոսկեղենի գրավադրմամբ բանկերից «վարկեր» ստանալու մեջ: Այսպես, ըստ մեղադրանքի, ամբաստանյալը ձեռք բերելով ոչ պատշաճ հարգի և որակի (ոսկեջրած արծաթից պատրաստված) կեղծ ոսկյա զարդեր, «հանցավոր համաձայնության է եկել «ՎՏԲ Հայաստան-բանկ» ՓԲ ընկերության «Ապարան» մասնաճյուղի ոսկերիչ Ջիվան Շահինյանի հետ` վերջինիս կողմից ոսկյա զարդերի հանձնման, ընդունման և ստուգման ակտեր կազմելու վերաբերյալ:

2010 թվականի հոկտեմբերի 30-ին կազմված, Ապարան քաղաքի բնակիչ Սեդրակ Սեդրակյանի անվամբ, կեղծ վարկային գործով, վարկային և գրավի պայմանագրերում նշված տվյալներին չհամապատասխանող և ոսկյա զարդեր չհանդիսացող 32.000 դրամ ընդհանուր արժողության, ոսկեջրած արծաթից, 1 թևնոցի և 1 շղթայի իբրև ոսկյա զարդերի գրավադրմամբ բանկի կողմից Ս.Սեդրակյանի անվամբ ելքագրված 605.000 ՀՀ դրամի վարկային գումարը ամբաստանյալը խաբեությամբ հափշտակել է՝ «ՎՏԲ Հայաստան-բանկ» ՓԲ ընկերությանը հասցնելով 537.000 դրամի վնաս։

Միաժամանակ պարզվել է, որ Գևորգ Եզնակյանը, 2011 թվականի կեսերին, իր մոտ աշխատանքի տեղավորելու պատրվակով, չարաշահելով Երևանում բնակվող Տաթևիկ Շաբոյանի վստահությունը, վերջինիս անվամբ և անձնագրով, որպես վարկ ձևակերպելու միջոցով ձեռք է բերել համակարգիչ և մոդեմ՝ խոստանալով անձամբ մարել դրանց արժեքը հանդիսացող 265.000 դրամը, սակայն հափշտակել է այդ գումարը, չի մարել վարկն ու չի վճարել պայմանագրով նախատեսված գումարները:

2010 թվականի հուլիս ամսին Գևորգ Եզնակյանը Երևանի Բելինսկի 46 տան բնակիչ Վահագն Հովհաննիսյանի հետ պայմանավորվել և 8500 ԱՄՆ դոլարով գնել է վերջինիս պատկանող «Պեժո 406» մակնիշի «06 ՍԱ 948» պետհամարանիշի ավտոմեքենան, վճարել է դրանից 3000 ԱՄՆ դոլար գումարը, սակայն Վ.Հովհաննիսյանի վստահությունը չարաշահելու եղանակով, տիրացել է վերջինիս ավտոմեքենային՝ չտալով տարբերությունը կազմող մնացած 5.500 ԱՄՆ դոլար գումարը /2.004.420 ՀՀ դրամ/:

2010 թվականի սեպտեմբերի վերջին օրերին Գևորգ Եզնակյանը, բանկից իր կողմից գրավադրված ոսկյա զարդերը գրավից հանելու պատրվակով, նույն Վահագն Հովհաննիսյանից, իբրև թե պարտքով խաբեությամբ վերցրել է նաև 630.000 ՀՀ դրամ գումար այն հաջորդ օրը վերադարձնելու պայմանով, սակայն հափշտակել է նաեւ այդ գումարը:

Պարզվել է նաև, որ Ապարան քաղաքի բնակիչ Թամարա Գրիգորյանի հարևանը հադիսացող Գևորգ Եզնակյանը, պատճառաբանելով, որ իր անվամբ արդեն վարկ կա ձևակերպված, իբրև թե տան համար կահույք գնելու պատճառաբանությամբ, խնդրել է Թամարա Գրիգորյանին ձևակերպել այդ կահույքը գնելու վարկը նրա անվամբ՝ խոստանալով մարել այն, սակայն 2008 թվականի մարտի 7-ին «Արդշինինվեստբանկ» ՓԲԸ-ի Ապարանի մասնաճյուղում կնքված վարկի պայմանագրով Թ. Գրիգորյանի անվամբ ձևակերպված վարկի գումարը՝ 320.000 դրամը, ստանալուց հետո, վստահությունը չարաշահելու եղանակով, հափշտակել ու տիրացել է դրան` չմարելով այդ վարկը, որի հետևանքով դատարանը վճռել է տոկոսների և տուգանքների հետ միասին բռնագրավել Թամարա Գրիգորյանից 423.826,20 դրամ:

ՀՀ Արագածոտնի մարզի ընդհանուր իրավասության առաջին ատյանի դատարանում տուժողների` Տաթևիկ Շաբոյանի և Թամարա Գրիգորյանի հետ հաշտվելու հիմքով Գևորգ Եզնակյանի նկատմամբ երկու դրվագով` ՀՀ քրեական օրենսգրքի 178-րդ հոդվածի 1-ին մասով` /Տաթևիկ Շաբոյանի և Թամարա Գրիգորյանի զգալի չափերով գույքը խարդախությամբ հափշտակելու վերաբերյալ/ քրեական գործի մասը կարճվել է և այդ մասով քրեական հետապնդումը դադարեցվել:

Ամբաստանյալ Գևորգ Եզնակյանը` նախաքննության փուլում երկու դրվագով ՀՀ քրեական օրենսգրքի 178-րդ հոդվածի 2-րդ մասի 2-րդ կետով և մեկ դրվագով ՀՀ քրեական օրենսգրքի 178-րդ հոդվածի 2-րդ մասի 1-ին և 2-րդ կետերով առաջադրված մեղադրանքում իրեն մեղավոր չի ճանաչել:

Դատաքննության սկզբնական փուլում Գևորգ Եզնակյանը առաջադրված մեղադրանքում իրեն մեղավոր չի ճանաչել, սակայն հետագայում ընդունել է ու ցուցմունք տվել առանձին դրվագների մասին: Ամբաստանյալը հայտնել է նաև, որ տուժողներին պատճառված վնասները իր և հարազատների կողմից հատուցվել են:

Եզնակյանին առաջադրված մեղադրանքները դատարանում հիմնավորվեցին, բայց նա ազատվեց կալանքից հենց դատական նիստերի դահլիճում: Արագածոտնի մարզի ընդհանուր իրավասության դատարանը՝ դատավոր Ս.Մնոյանի նախագահությամբ, Գևորգ Եզնակյանին մեղավոր ճանաչեց Հայաստանի Հանրապետության քրեական օրենսգրքի 178-րդ հոդվածի 2-րդ մասի 1-ին և 2-րդ կետերով և երկու դրվագով 178-րդ հոդվածի 2-րդ մասի 2-րդ կետով: Երկու հոդվածներով էլ նա դատապարտվեց ազատազրկման 2-ական տարի ժամկետով, սակայն «Համաներում հայտարարելու մասին» ՀՀ ԱԺ 26.05.2011թ. որոշման կիրառմամբ ազատվեց նշանակված ազատազրկում պատժից:

Դատավճռով ՀՀ ԱԱԾ Քննչական վարչությունում պահվող, քննիչի 13.11.2012թ. որոշմամբ իրեղեն ապացույց ճանաչված, Սեդրակ Սեդրակյանի ներկայացրած` ոսկեջրած արծաթե, 47,256 գրամ քաշով, 22.000 ՀՀ դրամ արժեքի շղթան, 20,016 գրամ քաշով,10.000 ՀՀ դրամ արժեքի թևնոցը բռնագրավվել է ՝ ի սեփականություն պետության:Հեղինակ:

Սոնա Մաշուրյան

«Փաստինֆո»