Մտահոգված են «ՀՀ Նախագահի երդմնակալության օրը հնարավոր սադրանքների և բախումների կապակցությամբ»
Գերմանահայոց կենտրոնական խորհուրդը մտահոգություն է հայտնել ՀՀ Նախագահի երդմնակալության օրը հնարավոր սադրանքների եւ բախումների կապակցությամբ:
«Փետրվարի 18-ի ՀՀ նախագահական ընտրություններից հետո Հայաստանի Հանրապետությունում քաղաքական իրավիճակը խիստ լարված է : Հակառակ որոշ կանխատեսումների մթնոլորտը գնալով շիկանում է եւ սպասվում է, որ այն իր կուլմինացիոն կետին կհասնի ապրիլի 9-ին`նախագահական երդմնակալության օրը: Կանխատեսելի է, որ կարող են սադրանքներ եւ բախումներ առաջանալ խաղաղ բնակչության ու օրինապահ մարմինների միջեւ եւ զարգացումները գնան մարտի 1-ի հայտնի դեպքերի սցենարով», – նշված է Խորհրդի տարածած հաղորդագրության մեջ:
Հայտարարության հեղինակները զորակցություն են հայտնում արդար պայքարին եւ հայտարարում, որ «որևւէ բիրտ ուժի կիրառում կամ սադրանք աննախադեպ բացասական ազդեցություն կունենա Հայաստանի իշխանություններ եւ Սփյուռք հարաբերությունների վրա»:
«Ի բարօրություն Հայ ժողովրդի, երկրի խաղաղ ու կայուն զարգացման` պահանջում ենք Հայաստանի Հանրապետության գործող իշխանություններից յուրաքանչյուր խնդրո առարկա կամ տարաձայնություն հանգուցալուծելիս կիրառել միմիայն իրավական, ազգանպաստ ևւ մարդասեր մոտեցում, որը կհանդիսանա ամուր հիմք Սփյուռք-Հայրենիք հարաբերությունների շարունակական զարգացման համար եւ առավել կբարձրացնի Հայաստանի Հանրապետության հեղինակությունը միջազգային արենայում», – նշված է հայտարարության մեջ:
