«Ժառանգության» հայտարարությունը՝ Պռոշյանի գյուղապետի սպանության կապակցությամբ
«Ժառանգություն» կուսակցությունն այսօր հայտարարություն է տարածել, որում անդրադարձել է Պռոշյանի գյուղապետ, դաշնակցական Հրաչ Մուրադյանի սպանությանը։ Հայտարարության մեջ ասվում է.
«Ժառանգություն» կուսակցությունում ցավով տեղեկացանք Պռոշյան ավանում կատարված սարսռեցնող ահաբեկչության մասին, որ ընդհատեց ազատամարտիկ, համայնքապետ Հրաչ Մուրադյանի կյանքը: Մեզանից հեռացավ մարդ, ով վայելում էր սեր և հարգանք, ով մասնակից ու հերոս էր Արցախյան ազատամարտի, ով ապրում և գործում էր ի շեն և բարօրություն հայրենի եզերքի:
Միայն երկրում առկա ամենաթողության և անպատժելիության մթնոլորտում կարող էր նման քստմնելի հանցագործություն կատարվել, երբ իր աշխատավայրի առջև իր աշխատակիցների հետ զրուցող համայնքապետը անշնչացած գետին տապալվի դավադիր ու հեռահար կրակոցից: Ում պատվերով և ում իրացմամբ է կատարվել հանցագործությունը՝ պատկան մարմինները պարտավոր են օր առաջ բացահայտել:
Խստորեն դատապարտելով կատարված ահաբեկչությունը պահանջում ենք հանցանքի շուտափույթ բացահայտում և սգո այս ժամին մեր վշտակցությունն ու կարեկցանքն ենք հայտնում Մուրադյանի հարազատներին, ընկերներին, կուսակիցներին»:
