Պռոշյանի գյուղապետի սպանության գործը հնարավոր է քննի ՀՔԾ-ն (լուսանկարներ)
Քիչ առաջ Ոստիկանության Կոտայքի մարզային վարչություն ահազանգ է ստացվել, որ Կոտայքի մարզի Պռոշյանի գյուղապետարանի դիմաց տղամարդու դի կա:
Ինչպես դեպքի վայրից հայտնում է ֆոտոլրագրող Գագիկ Շամշյանը, դեպքի վայր են ժամանել Ոստիկանության քրեական հետախուզության գլխավոր վարչության պետ Աշոտ Կարապետյանը, նույն վարչության պետի տեղակալ Սամվել Ասատրյանը, նույն վարչության 2-րդ վարչության պետ Ալիկ Մարգարյանը և նույն վարչության Արագ հակազդման բաժնի մեծ թվով աշխատակիցներ, ինչպես նաև Ոստիկանության Կոտայքի մարզային վարչության աշխատակիցները՝ մարզի ոստիկանապետ Գրիշա Բադալյանի գլխավորությամբ:
Ֆոտոլրագրողը հայտնում է, որ Ոստիկանության օպերատիվ-քննչական խումբը գյուղապետարանի մուտքի մոտ՝ գյուղապետին պատկանող ջիպ մակնիշի ավտոմեքենայի հետնամասում՝ գետնին ընկած, հայտնաբերվել է գյուղապետ Հրաչ Մուրադյանի դին:
Հավաքվածները ֆոտոլրագրողի հետ զրույցում ասում են, որ գյուղապետին սպանել են, սակայն, մեկ այլ վարկածով էլ նա հանկարծամահ է եղել, ինչը կպարզվի քիչ ուշ, քանի որ ժամանում են նաև փորձագետներն ու դատական բժիշկը: Արդեն դեպքի վայր են ժամանում Ոստիկանության քննչական գլխավոր վարչության Կոտայքի մարզի քննչական բաժնի քննիչները:
Ֆոտոլրագրողը հայտնում է, որ Հ. Մուրադյանը Արցախյան պատերազմի մասնակից էր, ամուսնացած էր, ուներ երեխաներ, և այս պահին ժամանում են նաև նրա մարտական ընկերները, այդ թվում՝ Շուշիի հատուկ գումարտակի հրամանատար Ժիրայր Սեֆիլյանը:
Քիչ առաջ Գ. Շամշյանը հայտնեց, որ եթե դիահերձմամբ հաստատվի սպանության հանգամանքը և պարզվի, որ այն կատարվել է մասնագիտական գործունեության հետ կապված, ապա հարուցված քրեական գործով քննությունը կանցկացվի Հատուկ քննչական ծառայությունում:
Լուսանկարները՝ Գագիկ Շամշյանի
