Շնչառական վարակները նահանջում են
Վերջին օրերին Հայաստանում շնչառական վարակներով հիվանդությունների նվազում է նկատվում։ Այս մասին լրագրողների հետ հանդիպման ընթացքում ասաց ՀՀ Առողջապահության նախարարության աշխատակազմի հիգիենիկ և հակահամաճարակային տեսչության վարակիչ և ոչ վարակիչ հիվանդությունների բաժնի պետ Լիլիթ Ավետիսյանը։ Նրա խոսքով՝ նվազել է նաև հիվանդության բարդացած դեպքերի թիվը։ Լիլիթ Ավետիսյանը նշեց, որ այժմ Հայաստանում համաճարակ չկա, կա միայն սեզոնային բռնկում։ Մասնագետի խոսքով՝ այժմ Հայաստանի մարզերում սուր շնչառական վարակներով 277 հիվանդ է հոսպիտալացված, թոքաբորբով՝ 125։ Երևանում թվերը մի փոքր ավելի բարձր են։ Իսկ շնչառական վարակներով 340 հիվանդ է հոսպիտալացված, թոքաբորբով՝ 118։ Լիլիթ Ավետիսյանն ասաց, որ նախարարության առաջարկով երկարաձգվել են դպրոցական արձակուրդները, քանի որ այս շրջանում հիվանդությունն ավելի շատ գրանցվում է դպրոցահասակ երեխաների մոտ։ Մանկապարտեզներում հաճախումները դադարեցնելու անհրաժեշտություն չի եղել։ Անդրադառնալով վերջերս Տավուշի մարզում 7-ամյա աղջկա մահվան դեպքին՝ Լիլիթ Ավետիսյանն ասաց, որ նրա մոտ Ա գրիպ է հայտնաբերվել։ Լիլիթ Ավետիսյանն ասաց, որ աղջկա հարազատները նրան շատ ուշ են տարել հիվանդանոց, երեխան մոտ 1 ամիս հիվանդ է եղել։ Բացի այդ, ըստ Լիլիթ Ավետիսյանի՝ աղջիկն ունեցել է նաև ուղեկցող հիվանդություն։
Լիլիթ Ավետիսյանը նաև ասաց, որ շատ դժվար է գրիպի դեմ պատվաստանյութ պատրաստել, քանի որ վարակն անընդհատ փոփոխվում է։
