Անակնկալ հյուր՝ «The Beautified Project» ռոք խմբի համերգին
«The Beautified Project» ռոք խմբի մարտի 21-ին կայանալիք համերգի նախապատրաստական աշխատանքները մոտենում են ավարտին: Այս ընթացքում խումբը հասցրեց ներկայացնել նաև «Its a Little Late» երգի տեսահոլովակը: Նշենք, որ երգը, չունենալով տեսահոլովակ, արդեն իսկ հասցրել էր սիրվել ինտերնետ-հասարակության շրջանում, ինչը ստիպել էր երգի ստեղծողներին մտածել նաև տեսահոլովակ նկարահանելու մասին:
«The Beautified Project»-ի անելիքների և ծրագրերի վերաբերյալ զրուցեցինք խմբի վոկալիստ և կիթառահար Անդրե Սիմոնյանի։ Նա նշեց, որ վերջին շրջանում զբաղված են թե՛ համերգային նախապատրաստական աշխատանքներով, թե՛ տարբեր հեռուստաալիքներին «Its a Little Late» երգի տեսահոլովակը ներկայացնելով: «Շատ ենք աշխատում, պատրաստում ենք մեր համերգային ծրագիրը: Համերգին բացի մեր երկու ալբոմների երգերից հնչելու են նաև նոր երգեր: Անհամբեր սպասում ենք այդ օրվան, քանի որ կարոտում ենք մեր հայ հանդիսատեսին» ,- ասաց Ա. Սիմոնյանը: Նա նաև տեղեկացրեց, որ համերգի ընթացքում հանդիսատեսին անակնկալներ են սպասվում. կա հյուր, ում անունը բարձրաձայնել դեռ չեն ցանկանում: Բեմում ելույթ են ունենալու նաև երգչուհի Էվան, Սոնա Ռուբինյանը: Համերգի բացմանը կերգի երգչուհի Էվան՝ ներկայացնելով 6 երգ:
Հիշեցնենք, որ «The Beautified Project» ռոք խմբի կազմավորման 8-ամյակի առիթով, մարտի 21-ին, Հ. Թումանյանի անվան Տիկնիկային թատրոնում տեղի կունենա խմբի համերգը:
