Թուրքիայում դատախազությունը պահանջել է ցմահ ազատազրկել գլխավոր շտաբի նախկին պետին
Թուրքական Anadolu լրատվական գործակալության փոխանցմամբ՝ Թուրքիայի դատախազությունը պահանջել է ցմահ ազատազրկման դատապարտել զինված ուժերի գլխավոր շտաբի նախկին պետ Իլքեր Բաշբուղին:
Վերջինս մեղադրվում է իշխող «Արդարություն ու զարգացում» կուսակցությանը (ԱԶԿ) վարկաբեկելու կամպանիա ծավալելու մեջ: Բացի այդ, ցմահ ազատազրկում է սպառնում պետհեղաշրջման (Էրգենեքոն) գործով 63 մեղադրյալին: Նրանց թվում են նաև ընդդիմադիր «Ժողովրդա-հանրապետական» կուսակցության (ԺՀԿ) ձերբակալված պատգամավորներ Մեհմեթ Հաբերալը և Մուսթաֆա Բալբայը:
Բաշբուղը հրաժարական է տվել 2010 թվականին և ձերբակալվել է 2012 թվականի հունվարի 6-ին: Դա աննախադեպ իրադարձություն է Թուրքիայի Հանրապետության պատմության ընթացքում, որ քաղաքացիական դատարանը կալանքի տակ է վերցնում Գլխավոր շտաբի նախկին պետին:
