Սիրիական ճգնաժամը երկու տարում ընդգրկել է երկրի գրեթե ողջ տարածքը. ՄԱԿ
Ռուսական Rosbalt լրատվական գործակալության փոխանցմամբ՝ երկու տարուց ավելի շարունակվող Սիրիական ճգնաժամն ընդգրկել է երկրի գրեթե ողջ տարածքը՝ քաղաքացիական հասարակությանը գրեթե չթողնելով անվտանգ շրջաններ, ուր կարելի կլիներ թաքնվել:
Այսպիսի եզրակացություն է կատարված ՄԱԿ-ի հումանիտար օպերացիաների կոորդինացման տարածաշրջանային վարչության պատրաստած զեկույցում. «Հակամարտությունն առնչվել է սիրիական յուրաքանչյուր ընտանիքի: Դա և՛ կրթության անմատչելիությունն է, և՛ աղքատությունը, և՛ սովը, և՛ խմելու ջրի պակասը, և՛ հիվանդությունները, և՛ բժշկական օգնության բացակայությունը:
Երկրում այլևս չկան անվտանգ շրջաններ քաղաքացիական անձանց համար, մարդիկ հուսահատված են և կորցրել են հակամարտության ավարտին սպասելու հույսը»:
Կազմակերպության տվյալներով՝ հակամարտության հետևանքով զոհվել է ավելի քան 70.000 մարդ, ավելի քան 4 միլիոն սիրիացի հումանիտար հապճեպ օգնության կարիք ունի երկրի ներսում, իսկ փախստականների քանակն էլ մեկ տարում 33.000-ից մեծացել է մինչև 1.1 միլիոն մարդու և օրական ավելանում է մի քանի հազարով:
