Վրացական գինին և «Բորժոմին» կարող են վերադառնալ ռուսական շուկա
«Роспотребнадзор»-ի ներկայացուցիչները փետրվարի 25-ին մեկնել են Վրաստան՝ գինու և հանքային ջրերի ջրերի տեղական արտադրությունները ստուգելու նպատակով։ Ինչպես տեղեկացնում է «Интерфакс»-ը, այդ մասին հայտարարել է «Роспотребнадзор»-ի ղեկավար Գեննադի Օնիշչենկոն։
Ռուսաստանցի մասնագետները կվերադառնան մարտի 1-ին։ Դրանից հետո նոր միայն որոշում կկայացվի՝ թույլատրե՞լ վրական ընկերությունների արտադրանքի մուտքը ռուսաստանյան շուկա, թե՞ ոչ։
Ստուգման են ենթարկվելու 44 ընկերություններ, որոնցից 40-ը զբաղվում են գինու արտադրությամբ, մնացած չորսը՝ հանքային ջրերի։ Օնիշչենկոյի խոսքերով, դրական եզրակացության դեպքում վրացական ընկերությունները կարող են սկսել մատակարարումները դեպի Ռուսաստան արդեն այս տարվա գարնանը։
Հիշեցնենք, որ վրացական գինիների և «Բորժոմի» հանքային ջրի մուտքը Ռուսաստան արգելվել ղր դեռ 2006 թվականին։ Որպես պաշտոնական պատճառ՝ նշվում էր, որ խախտվել են սանիտարահիգիենիկ նորմերը։
