Վրաստանում համաներմամբ բանտերից ազատ է արձակվել մոտ 8000 մարդ
Новости-Грузия լրատվական գործակալության փոխանցմամբ՝ Վրաստանում փետրվարի 22-24-ին համաներմամբ ազատ է արձակվել ևս 104 բանտարկյալ: Այս մասին հայտարարել է Պատիժների իրագործման ու իրավական օգնության նախարարության մամուլի ծառայությունը:
Վերջինիս հաղորդմամբ՝ 2013 թվականի փետրվարի 24-ի դրությամբ համաներմամբ Վրաստանի ուղղիչ հիմնարկները լքել է 7899 դատապարտյալ, այդ թվում նաև՝ 175 քաղբանտարկյալ:
Վրաստանի խորհրդարանը «Համաներման մասին» օրենքն ընդունել է 2012 թվականի դեկտեմբերի 21-ին: Դեկտեմերի 27-ին դրա վրա վետո է դրել նախագահ Միխեիլ Սաակաշվիլին, սակայն դրա հաջորդ օրն օրենսդիր մարմինը կարողացել է հաղթահարել նախագահական վետոն: Դրանից հետո դրա վրա իր ստորագրությունն է դրել Վրաստանի խորհրդարանի նախագահ Դավիթ Ուսուպաշվիլին, և այն 2013 թվականի հունվարի 13-ին մտել է ուժի մեջ:
