Վրաստանի ՆԳՆ-ում հայտնաբերվել է 2012 թվականին կատարված գաղտնալսումների խոշոր արխիվ
Грузия Online-ի փոխանցմամբ՝ Վրաստանի ներքին գործերի նախարար Իրակլի Գարիբաշվիլին հայտարարել է, որ ՆԳՆ-ի արխիվներում գաղտնի ձայնագրությունների հետ մեկտեղ հայտնաբերվել են իր հեռախոսազրույցները և բազմաթիվ հայտնի անձնաց անձնական կյանքի մասին տեսանյութեր.
«Գաղտնի արխիվում մենք հայտնաբերել ենք ողջ տարվա ընթացքում կատարված իմ հեռախոսազրույցները: Մենք հայտնաբերել ենք նաև այլ հետաքրքիր նյութեր, այդ թվում նաև բազմաթիվ հայտնի անձանց անձնական կյանքի մասին տեսանյութեր: Դա նողկալի է:
Մենք ևս մեկ անգամ համոզվեցինք, թե ինչ գործ են բռնել և ինչպիսի մեթոդներով են աշխատել ընդդիմադիրների դեմ: Դա բավական ծավալուն արխիվ է: Դրանք շատ ծանր կադրեր են և մենք չենք պատրաստվում հրապարակել դրանք: Սակայն շուտով տվյալ գործով կհարցաքննվեն կոնկրետ անձինք: Տարվում է հետաքննություն»:
