Եթե հասկանայի՝ ինչո՞վ է առաջնորդվում ԱԱԾ-ն, գուցե իրենց գործակալը լինեի
«Սիվիլիթաս» հինմադրամի կողմից կազմակերպած քննարկման ժամանակ ԱԺ պատգամավոր, «Ազատ դեմոկրատներ» կուսակցության անդամ Ալեքսանդր Արզումանյանը հյուրերից մեկի խնդրանքով անդրադարձավ ԲՀԿ-ական պատգամավոր, նախկին արտգործնախարար Վարդան Օսկանյանի դեմ առաջադրված մեղադրանքներին:
Արզումանյանը հիշեցրեց. «2008-ին այլ բաներ էլ են եղել՝ Կոնգրեսի ակտիվիստ Տիգրան Առաքելյանի և իր ընկերների դատապարտումը: Այսինքն՝ Հայաստանը չի հրաժարվել քաղաքական ընդդիմախոսներին դատապարտելու ուղիներից»:
Պատգամավորը նաև հավելեց. «Այն, որ պարոն Օսկանյանի նկատմամբ իրականացվել է քաղաքական հետապնդում, ես դա բազմիցս ասել եմ, հիմա էլ կրկնում եմ: Մենք այս առումով բախտակից ենք պարոն Օսկանյանի հետ, երկուսս էլ, ըստ իշխանությունների, փողերի լվացմամբ ենք զբաղվել: Եթե կարողանայի հասկանալ՝ ինչո՞վ է առաջնորդվում ԱԱԾ-ն, գուցե լինեի իրենց գործակալը և ոչ թե քաղաքական գործիչ: Իսկ ես երբևէ հրաժարվում եմ մեկնաբանել մարդկանց, ում արարքներն ինձ համար անընդունելի են»:
Ալ. Արզումանյանը նշեց, որ «պարոն Օսկանյանը շատ հայտնի մարդ է ՀՀ-ում, իսկ կան մարդիկ, որոնց անունները մենք չգիտենք, բայց որոնք ամեն օր նման հետապնդումների են ենթարկվում»:
