Միլոշ Զեմանը՝ Չեխիայի առաջին նախագահական ընտրությունների հաղթող

Չեխիայում անցկացված՝ նախագահի առաջին ուղղակի ընտրություններում հաղթանակ է տարել Միլոշ Զեմանը։ Այս մասին հաղորդում է France-Presse գործակալությունը։

Ընտրությունների երկրորդ փուլում նա 15%-ով առաջ է անցել իր հիմնական մրցակցից՝ իշխան Կարել Շվարցենբերգից։

Ընտրություններին մասնակցել է ընտրողների 57.36 տոկոսը։ Նշենք, որ Չեխիայում մասնակցության նվազագույն շեմ գոյություն չունի։

Նոր նախագահի երդմնակալության արարողությունը տեղի կունենա մարտի 8-ին։

Նախագահի ուղղակի ընտրություններ Չեխիայում անցկացվում են առաջին անգամ։ Համապատասխան որոշումը ստորագրվել է 2012 թվականի փետրվարին երկրի ներկայիս ղեկավար Վացլավ Կլաուսի կողմից։ Մինչ այդ նախագահն ընտրվում էր պառլամենտի երկու պալատների ընդհանուր նիստում։