Րաֆֆի Հովհաննիսյանն իր որդու գիրքը փոխանցեց գրադարանին. քարոզարշավ
Այս պահին ընթանում է ՀՀ նախագահի թեկնածու, «Ժառանգություն» կուսակցության նախագահ Րաֆֆի Հովհաննիսյանի նախընտրական քարոզարշավը։ Նա երթուղին սկսեց Մարտիրոս Սարյանի արձանի մոտից, և ուղևորվեց դեպի Երվանդ Քոչարի տուն-թանգարան:
Րաֆֆի Հովհաննիսյանը մտավ Երվանդ Քոչարի տուն-թանգարան, հարցրեց մուտքի տոմսի արժեքը, որպեսզի վճարեր, սակայն տուն-թանգարանի աշխատակիցները նրանից գումար չվերցրեցին:
Ճանապարհին նա ջերմ բարևում էր անցորդներին, հարցնում առողջության մասին։ Հետո նա մոտեցավ Մատենադարանի շենքին, բայց ներս չմտավ: Մատենադարանից այդ պահին դուրս էր գալիս ՀՀ մշակույթի նախարար Հասմիկ Պողոսյանը, ում Րաֆֆի Հովհաննիսյանի համակիրներից մեկը փոխանցեց թեկնածուի նախընտրական բուկլետը:
Հասմիկ Պողոսյանը շփոթվեց՝ երկմտում էր՝ վերցնե՞լ այն, թե՞ ոչ։ Ի վերջո, վերցրեց:
Այնուհետև Րաֆֆի Հովհաննիսյանը ուղևորվեց դեպի Ճարտարագիտական համալսարան, որտեղ նա փնտրում էր գրադարանի տեղը։ Լրագրողների հետ զրույցում նա ասաց, որ ցանկանում է գրադարանին նվիրել իր ավագ որդու՝ Կարինի հեղինակած «Գերդաստան ստվերաց» գիրքը։
Այս պահին Րաֆֆի Հովհաննիսյանը գտնվում է Ազգային գրադարանի շենքում։
