BMW-ն ռեկորդային վաճառք է ունեցել 2012 թվականին
Գերմանական BMW ավտոարտադրողը հայտարարել է, որ 2012 թվականին գրանցել է մեքենաների վաճառքի նոր ռեկորդ։ BMW, Mini և Rolls Royce մեքենաների վաճառքի ծավալներն աճել են 10.6%-ով և կազմել 1.85 միլիոն ավտոմեքենա։ Դա ընկերության պատմության մեջ ամենաբարձր ցուցանիշն է։
Պրեմիում դասի մեքենաների վաճառքի ծավալներն աճել են առաջին հերթին ԱՄՆ-ում և Չինաստանում։ BMW մակնիշի մեքենաների վաճառքի ծավալը նույնպես ռեկորդային է եղել և հասել 1.54 միլիոնի։
«Մենք նոր տարի ենք մտնում շատ դրական պահի՝ չնայած որոշ շուկաներում գերիշխող բացասական միտումների։ Մենք ձգտելու ենք ևս մեկ ռեկորդ սահմանել 2013 թվականին»,- ասել է BMW-ի վաճառքների գծով ղեկավար Յան Ռոբերտսոնը։ Լավատեսության պատճառն այն է, որ այս տարի շուկա է դուրս գալու BMW i3 էլեկտրոմոբիլը։
Ինչ վերաբերում է Rolls Royce-ին, ապա 2012 թվականին վաճառվել է 3575 հատ ավտոմեքենա։ Դա ամենաբարձր ցուցանիշն է ընկերության 108-ամյա պատմության ընթացքում։
